ரீ ரிலீஸில் சூப்பர் டூப்பர் ஹிட்டான கில்லி… கவலை தெரிவித்து பேசிய ஓட்டேரி நரி!

தமிழகத்தில் சமீக காலமாக 90-களில் வெளிவந்து ரசிகர்களின் வரவேற்ப்பை பெற்ற திரைப்படங்கள் மீண்டும் திரையரங்குகளில் திரையிடப்படுவது ட்ரெண்டாகி வருகிறது. இந்நிலையில், ஏ.எம். ரத்னம் தயாரிப்பில், தரணி இயக்கத்தில், இளைய தளபதி விஜய்-த்ரிஷா நடிப்பில் 2004 ஆம் ஆண்டு வெளியான கில்லி திரைப்படம் தமிழகம் முழுவதும் திரையரங்கில் மீண்டும் ரிலீஸ் செய்யப்பட்டுள்ளது. இந்த திரைப்படத்தில் பிரகாஷ்ராஜ், ஆசிஷ் வித்யார்த்தி, தாமு, மயில்சாமி, மோனிஷா, நாகேந்திர பிரசாத், பொன்னம்பலம் உள்ளிட்ட பலர் நடித்திருந்தனர்.

தமிழகம் முழுவதும் விஜய் நடித்துள்ள கில்லி திரைப்படம் மீண்டும் ரிலீஸ் செய்யப்பட்ட நிலையில், மிகப்பெரிய வரவேற்ப்பை பெற்று வருகிறது. வெகு நாட்களாக ரசிகர்கள் எதிர்பார்த்து காத்திருந்த திரைப்படம் என்பதால், எதிர்பார்த்ததை விட மிகப்பெரிய அளவில் முதல் நாளே ரசிகர்கள் கூட்டம் இருந்ததாக திரையரங்க உரிமையாளர்கள் தெரிவித்துள்ளனர். ரீ-ரிலிஸான திரையரங்குகளில் ஹவுஸ் ஃபுல் காட்சிகளாக, ரசிகர்கள் கூட்டம் நிரம்பிவழிகிறது.

தற்போது 20 ஆண்டுகள் கழித்தும் இந்த திரைப்படத்திற்கு அதே வரவேற்பு கிடைத்துள்ளது.மற்ற திரைப்படங்கள் ரீ ரிலீஸ் செய்யப்பட்டு சில நாட்களுக்கு பிறகு திரையிடப்படுவது நிறுத்தப்பட்ட நிலையில், கில்லி திரைப்படத்திற்கு வரவேற்பு இன்னும் குறையவில்லை. குறிப்பாக இளம் தலைமுறையினர் மத்தியில் கில்லி திரைப்படம் நல்ல வரவேற்பை பெற்றுள்ளது.

ஏற்கனவே பலமுறை தொலைக்காட்சியில் பார்த்த ஒரு படத்தை ரசிகர்கள் இந்த அளவிற்கு கொண்டாடுவது ஆச்சரியத்தை ஏற்படுத்தியுள்ளது. தமிழகம் முழுவதும் ஹவுஸ்புல் காட்சிகளாக நிரம்பி வழிகிறது. இன்ஸ்டகிராம், பேஸ்புக், எக்ஸ் தளம் என்று அனைத்து சமூக வலைதளங்களிலும், கில்லி திரைப்படம் குறித்த வீடியோக்களும், பிரபலங்களின் வாழ்த்து மழையும் ட்ரெண்டாகி வருகிறது. இந்நிலையில் ரீ ரிலீசில் கில்லி திரைப்படம் ரூ.2 கோடி வசூல் ஈட்டியுள்ளதாகவும் தகவல்கள் தெரிவிக்கின்றன.

Also read… பிரபாஸின் கல்கி படம் பிரபல ஹாலிவுட் படத்தின் காப்பியா? இணையத்தில் வைரலாகும் தகவல்!

இந்நிலையில் கில்லி திரைப்படம் குறித்து பேசிய நடிகர் தாமு, “கில்லி திரைப்படம் கடந்த 20 ஆண்டுகளுக்கு முன்பு வெளியானது. அந்த படத்தில் ஓட்டேரி என்ற கதாப்பாத்திரத்தில் நான் நடித்திருந்தேன். தற்போது 20 வருடங்கள் கழித்து அந்த திரைப்படம் ரீ ரிலீஸ் ஆகி வெற்றிகரமாக ஓடுகிறது”.

”20 வருடங்களுக்கு முன்பு வெளியான கில்லி திரைப்படத்தை விசில் அடித்து கொண்டாடுகிறீர்கள். ஆனால் 20 வருடங்களுக்கு முன்பு நடப்பட்ட மரக்கன்றுகள் தற்போது பல இடங்களில் வெயிலுக்கு நிழல் தருகிறது. அந்த மரக்கன்றுகளை நட்டவர்களுக்கு எப்போதாவது விசில் அடித்து கொண்டாடியிருக்கீர்களா” என நிகழ்ச்சி ஒன்றில் பங்கேற்ற அவர் விரக்தியுடன் பேசியுள்ளார்.