Rajinikanth: அழுகையை அடக்க முடியவில்லை.. கண்டிப்பா பாருங்க.. அமரன் பற்றி ரஜினி பெருமிதம்!

அமரன் படம்: சிவகார்த்திகேயன், சாய் பல்லவி நடிப்பில் ராஜ்குமார் பெரியசாமி இயக்கத்தில் உருவாகியுள்ள படம் “அமரன்”. இந்த படம் தீபாவளி வெளியீடாக கடந்த அக்டோபர் 31 ஆம் தேதி திரைக்கு வந்தது. தமிழ், தெலுங்கு, மலையாளம், கன்னடம், இந்தி என 5 மொழிகளில் வெளியாகியுள்ள அமரன் படத்துக்கு இசையமைப்பாளர் ஜி.வி.பிரகாஷ்குமார் இசையமைத்துள்ளார். இதனிடையே தமிழ் சினிமாவின் சூப்பர் ஸ்டாரான ரஜினிகாந்த் அமரன் படத்தைப் பாராட்டி அப்படத்தின் இயக்குநர் ராஜ்குமார் பெரியசாமி, நடிகர் சிவகார்த்திகேயன் ஆகியோரை நேரில் அழைத்து பாராட்டியதோடு  அதனை வீடியோவாகவும் பதிவிட்டுள்ளார். இதுதொடர்பாக ராஜ்கமல் நிறுவனம் வீடியோ ஒன்றை வெளியிட்டுள்ளது.

அதில் பேசும் ரஜினிகாந்த், “அனைவருக்கும் வணக்கம். நேற்று தான் ராஜ்கமல் நிறுவனம் தயாரித்துள்ள அமரன் படம் பார்த்தேன். முதலில் கமல்ஹாசனை எவ்வளவு பாராட்டினாலும் பத்தாது. காரணம் மறைந்த ராணுவ வீரர் முகுந்த் வரதராஜனின் வாழ்க்கை வரலாறை படமாக எடுக்க வேண்டும் என அவர் எடுத்த முடிவை எடுத்ததற்காக முதலில் எனது பாராட்டை தெரிவித்துக் கொள்கிறேன்.

அந்த படத்தை நினைத்து பார்ப்பதை விட ராஜ்குமார் பெரியசாமி இயக்கிய விதம் மிக மிக அருமை. ராணுவத்தைப் பற்றி எவ்வளவோ படம் எடுத்திருக்கிறார்கள். ஆனால் இந்த மாதிரி எடுத்தது இல்லை. கேமரா மேன், எடிட்டர், இசையமைப்பாளர் என எல்லாரையும் வைத்து ரொம்ப அருமையாக எடுத்துள்ளார்.

The Voice of Honor 🔥#Superstar @rajinikanth Sir praised Team #Amaran #AmaranDiwali #MajorMukundVaradarajan #KamalHaasan #Rajinikanth #Sivakarthikeyan #SaiPallavi #RajkumarPeriasamy

A Film By @Rajkumar_KP @ikamalhaasan @Siva_Kartikeyan #Mahendran @Rajkumar_KP… pic.twitter.com/o6xQytOTke

— Raaj Kamal Films International (@RKFI) November 2, 2024

நம்முடைய சிவகார்த்திகேயன் கேரக்டராகவே வாழ்த்திருக்கிறார். அவரின் கேரியரில் மிகச்சிறந்த படங்களில் ஒன்றாக இது இருக்கும். அந்த மாதிரி தனது கேரக்டரில் மிகவும் சிறப்பாக நடித்திருக்கிறார். அதுமட்டுமல்லாமல் சாய் பல்லவி நடித்துள்ள இந்து கேரக்டர் 2 பேரும் அமரன் படத்தை தூக்கி நிறுத்தியுள்ளார்கள். படம் பார்த்து முடிக்கும்போது என்னால் அழுகையை அடக்க முடியவில்லை.

இப்படத்தைப் பார்க்கும்போது எனக்கு தனிப்பட்ட முறையில் உணர்வுப்பூர்வமாக இருந்தது என்னவென்றால், என்னுடைய இரண்டாவது அண்ணன் நாகேஸ்வர ராவ் கெய்க்வாட் 14 ஆண்டுகள் ராணுவத்தில் பணியாற்றினார். அவர் சீனாவுடனான போரில் களம் கண்ட நிலையில் முதுகில் துப்பாக்கிக்குண்டு பாய்ந்து அதன்பிறகு விருப்ப பணி ஓய்வுப் பெற்றார். அமரன் படம் எல்லோரும் பார்க்க வேண்டிய படம். ராணுவ வீரர்கள் எல்லாரும் எவ்வளவு கஷ்டப்படுகிறார்கள். அவர்கள் எல்லையில் நம்மை காக்கவிட்டால் ஒன்னுமே இல்லை. தயவு செய்து எல்லாரும் இந்த படத்தை பாருங்கள் என தெரிவித்துள்ளார்.