நாளை மாலை 5 மணிக்கு விஜய் ரசிகர்களுக்கு ட்ரீட்… வெங்கட் பிரபு கொடுத்த அப்டேட்

கோட்

நடிகர் விஜய் நடிப்பில் உருவாகியுள்ள ‘தி கிரேட்டஸ்ட் ஆஃப் ஆல் டைம்’ படத்தின் ட்ரெய்லர் நாளை மாலை 5 மணிக்கு வெளியாகும் என்று இயக்குநர் வெங்கட் பிரபு தனது எக்ஸ் தள பக்கத்தில் தெரிவித்துள்ளார். லியோ படத்தை தொடர்ந்து நடிகர் விஜய் தற்போது இயக்குநர் வெங்கட் பிரபு இயக்கத்தில் நடித்துள்ள படம் ‘தி கிரேட்டஸ்ட் ஆஃப் ஆல் டைம்’. இந்தப் படத்தில் விஜயுடன் பிரபுதேவா, பிரசாந்த், சினேகா, மீனாக்‌ஷி செளதரி, லைலா, வைபவ் , பிரேம்ஜி உள்ளிட்ட பலர் நடித்து வருகிறார்கள். எ.ஜி.எஸ் என்டர்டெயின்மெண்ட் சார்பாக அர்ச்சனா கல்பாத்தி இப்படத்தைத் தயாரித்து வருகிறார். இசையமைப்பாளர் யுவன் ஷங்கர் ராஜா இப்படத்திற்கு இசையமைத்துள்ளார். கடைசியாக விஜய்யின் புதிய கீதை படத்துக்கு இசையமைத்த யுவன், அதன் பின்னர் சுமார் 21 ஆண்டுகளுக்கு பின்னர் விஜய்யுடன் இணைந்திருக்கிறார்.

இரண்டு வேடங்களில் விஜய் நடிப்பதாக கூறப்பட்டாலும், கோட் படத்தின் ஒன்லைன் ஸ்டோரி பற்றிய அப்டேட் இதுவரை வெளியாகவில்லை.  சென்னை, ரஷ்யா, திருவனந்தபுரம், புதுச்சேரி உள்ளிட்ட பல்வேறு இடங்களில் கோட் திரைப்படத்தின் படப்பிடிப்பு நடைபெற்று வந்த நிலையில் படம் இறுதி கட்டத்தை எட்டியுள்ளது. கோட் திரைப்படம் வருகிற செப்டம்பர் மாதம் 5-ந் தேதி விநாயகர் சதுர்த்தி பண்டிகையையொட்டி திரைக்கு வர உள்ளது. இந்தப் படத்தின் படப்பிடிப்பு முடிவடைந்து, தற்போது முழுவீச்சில் கிராபிக்ஸ் பணிகள் உள்பட தொழில்நுட்ப பணிகள் நடைபெற்று வருகிறது. அப்படத்தின் ரிலீஸ் நெருங்கி வருவதால் அதன் அப்டேட்டுகளும் ஒவ்வொன்றாக கசிந்த வண்ணம் உள்ளன.

Also read… National Film Awards : ரஹ்மான் முதல் நித்யா மேனன் வரை.. தேசிய விருதுகளை வென்ற கோலிவுட் படைப்புகள்.. முழு லிஸ்ட்

இப்படத்தின் முதல் சிங்கிள் பாடலான ‘விசில் போடு’ கடந்த முன்னதாக வெளியானது. இதையடுத்து விஜயின் பிறந்த நாளை முன்னிட்டு கடந்த ஜூன் 22-ம் தேதி ’கோட்’ படத்திலிருந்து இரண்டாவது சிங்கிள் வீடியோ மற்றும் கிளிம்ஸ் வீடியோ என அடுத்தடுத்த சர்ப்ரைஸ்களை ரசிகர்களுக்கு கொடுத்து இன்ப அதிர்ச்சி அளித்தது படக்குழு. ’சின்ன சின்ன கண்கள்’ எனத் தொடங்கும் இந்தப் பாடல் நடிகர் விஜய் மற்றும் மறைந்த பாடகி பவதாரணி குரலில் வெளியானது. பாடகி பவதாரணி சமீபத்தில் உயிரிழந்த நிலையில் அவரது குரல் ஏஐ மூலம் இந்த பாடலில் பயன்படுத்தப்பட்டுள்ளது. விஜய் மற்றும் சினேகாவின் காம்போவில் உருவாகி இருக்கும் இந்த மொலோடி பாடலை கபிலன் வைரமுத்து எழுதி இருக்கிறார்.

இந்த நிலையில் நேற்று சுதந்திர தினத்தை முன்னிட்டு விஜய் தனது இன்ஸ்டாகிராம் பக்கத்தில் பதிவு ஒன்றை வெளியிட்டார். அதில் 17-ம் தேதி ‘கோட்’ படத்தின் ட்ரெய்லர் வெளியாகும் என்று போஸ்டர் ஒன்றுடன் அறிவித்திருந்தார். இந்த நிலையில் இன்று இயக்குநர் வெங்கட் பிரபு தனது எக்ஸ் தள பக்கத்தில் நாளை மாலை 5 மணிக்கு படத்தின் ட்ரெய்லரை வெளியிட உள்ளதாக அறிவித்துள்ளார். இதனை விஜய் ரசிகர்கள் சமூக வலைதளத்தில் கொண்டாடி வருகின்றனர்.