“பொய்யான செய்தி பரப்பாதீங்க” உத்தம வில்லன் படம் குறித்து லிங்குசாமி அறிக்கை!

கமல்ஹாசன் நடிப்பில் வெளியான உத்தமவில்லன் திரைப்படம் மிகப்பெரிய நஷ்டம் ஆனதால் தான் லிங்குசாமியின் திருப்பதி பிரதர்ஸ் நிறுவனம் பெரிய அளவு பணக்கஷ்டத்தில் மாட்டி அதன் பிறகு பெரிய அளவில் படங்கள் தயாரிக்காமல் போனதற்கு காரணம் என்று இயக்குனர் லிங்குசாமி தெரிவித்துள்ளார்.

ஆனந்தம் திரைப்படத்தின் வாயிலாக தமிழ் சினிமாவில் இயக்குனராக லிங்குசாமி அறிமுகமானார். தொடர்ந்து ரன், சண்டக்கோழி, பையா, வேட்டை என பல கமர்ஷியல் ஹிட் படங்களை இயக்கியுள்ளார். அத்துடன் திருப்பதி பிரதர்ஸ் என்ற தயாரிப்பு நிறுவனத்தின் வாயிலாக பல வெற்றிப்படங்களை தயாரித்தார்.

இயக்குநர் ரமேஷ் அரவிந்த் இயக்கத்தில் உருவான திரைப்படம் எதிர்பார்த்த அளவிற்கு வரவேற்ப்பை பெறவில்லை என்று கூறப்பட்ட நிலையில், யூடியூப் சேனலில் உத்தமவில்லன் படம் லாபம் தான் என பிரபல பத்திரிகையாளர் பேசி இருப்பதற்கு திருப்பதி பிரதர்ஸ் நிறுவனம் பொய் என குறிப்பிட்டு மறுப்பு தெரிவித்து அறிக்கை வெளியிட்டுள்ளது. அந்த அறிக்கையில் குறிப்பிட்டுள்ளதாவது,

உலக திரை ரசிகர்களுக்கு அன்பான வணக்கம், தீபாவளி, பையா, வேட்டை, இவன் வேற மாதிரி, வழக்கு எண் 18/9 , கும்கி, கோலிசோடா, மஞ்சப்பை, சதுரங்க வேட்டை , ரஜினிமுருகன் போன்ற தரமான மிகப்பெரிய வெற்றிப்படங்களையும், தேசிய விருதுகள் மற்றும் தமிழ்நாடு அரசின் திரைப்பட விருதுகளையும் பெற்ற படங்களை தயாரித்து வெளியிட்ட எங்கள் திருப்பதி பிரதர்ஸ் நிறுவனம்தான் பத்மஸ்ரீ கமலஹாசன் அவர்களை வைத்து FIRST COPY (முதல் பிரதி) அடிப்படையில் தயாரித்த திரைப்படமான “உத்தம வில்லன்” எங்கள் நிறுவனத்திற்கு மிகப்பெரிய பொருளாதார நஷ்டத்தையும், நிதி நெருக்கடியையும், ஏற்படுத்திய படமாகும்.

இது கமல்ஹாசன் அவர்களுக்கும் நன்றாகவே தெரியும். “உத்தம வில்லன்” திரைப்படத்தின் மிகப்பெரிய நஷ்டத்தை ஈடுகட்டுவதற்காக கமலஹாசன் அவர்களும் அவரது சகோதரர் அமரர். சந்திரஹாசன் அவர்களும் எங்கள் நிறுவனத்திற்கு மீண்டும் ஒரு படம் நடித்து தயாரித்து தருவதாக எழுத்துப்பூர்வமாக உறுதி அளித்துள்ளனர்.

அதற்குண்டான வேலைகளில் திருப்பதி பிரதர்ஸ் நிறுவனம் ஈடுபட்டுக்கொண்டிருக்கும் வேளையில் சமூக வலைத்தளமான “வலை பேச்சு” என்கிற YOUTUBE சேனலில் உத்தம வில்லன் மிகப்பெரிய லாபகரமான படம் என்று இயக்குனர் திரு லிங்குசாமி கூறியதாக இன்று ( 17-04-2024 ) தவறான தகவல்களை கூறியுள்ளனர் .

இது முற்றிலும் கண்டிக்கத்தக்கது. இதுபோன்ற தவறான பொய்யான தகவல்களை சமூக வலைத்தளங்களில் பரப்ப வேண்டாம் என கேட்டுக்கொள்கிறோம். இவ்வாறுஅறிக்கையில் குறிப்பிடப்பட்டுள்ளது.