Theatre Release Movies: நாளை தியேட்டரில் வெளியாகும் படங்களின் லிஸ்ட் இதோ

படங்கள்

சூர்யாவின் நடிப்பில் தற்போது உருவாகி ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ள படம் கங்குவா. இந்த படத்தினை இயக்குநர் சிறுத்தை சிவா இயக்கியுள்ளார். மன்னர் காலக் கதையைக் கொண்டு எடுக்கப்பட்டு வரும் இந்த படம்தான் சூர்யாவின் நடிப்பில் அதிக பொருட்செலவில் உருவாக்கப்பட்டுள்ள படம். தேவி ஸ்ரீ பிரசாத் இந்த படத்துக்கு இசையமைத்துள்ளார். இப்படத்தில் சூர்யாவுடன் திஷா பதானி, பாபி தியோல், கோவை சரளா, யோகிபாபு, ரெட்டின் கிங்ஸ்லி, நடராஜன் சுப்பிரமணியன், ஜெகபதி பாபு, கே.எஸ்.ரவிகுமார் உள்ளிட்ட பலர் இணைந்து நடித்துள்ளனர். இந்தப் படம் 10க்கும் மேற்பட்ட மொழிகளில் 3டி தொழில்நுட்பத்தில் படம் எடுக்கப்பட்டு வருகிறது. நடிகர் சூர்யா இந்தப் படத்தில் 13 விதமான தோற்றங்களில் நடிப்பதாக தெரிவிக்கப்பட்டிருப்பதால் படத்தின் மீது ரசிகர்களுக்கு பெரும் எதிர்பார்ப்பு நிலவுகிறது. இந்த நிலையில் கங்குவா படம் நாளை 14-ம் தேதி திரையரங்குகளில் வெளியாகவுள்ளது.

அசோக் செல்வன் நடிப்பில் முன்னதாக வெளியான ‘ப்ளூ ஸ்டார்’ திரைப்படம் ரசிகர்களிடையே நல்ல வரவேற்பை பெற்றது. அவர் நடிப்பில் அடுத்ததாக வெளியாக உள்ள படம் ‘எமக்குத் தொழில் ரொமான்ஸ்’. இந்தப் படத்தை அறிமுக இயக்குநர் பாலாஜி கேசவன் இயக்கியுள்ளார். அவந்திகா நாயகியாக நடித்துள்ள இப்படத்தில் எம்.எஸ்.பாஸ்கர், ஊர்வசி, அழகம்பெருமாள், பகவதி பெருமாள், விஜய் வரதராஜ், படவா கோபி உள்ளிட்ட பலர் நடித்துள்ளனர். இந்தப் படத்தின் ட்ரெய்லரை படக்குழு முன்னதாக வெளியிட்டது. ஒரு இளைஞனின் காதல், அதனால் ஏற்படும் பிரச்சனைகள், அவனுக்கு உதவும் குடும்பம், நண்பர்கள் என ரொமான்ஸ் காமெடி திரைப்படமாக இந்த படம் உருவாகியுள்ளது என ட்ரெய்லரை பார்க்கும் போது தெரிந்தது. இந்நிலையில் இந்தப் படம் வரும் 15-ம் தேதி திரையரங்குகளில் வெளியாகவுள்ளது குறிப்பிடதக்கது.

நடிகர் வருண் தேஜ் நடிப்பில் இயக்குநர் கருணா குமார் இயக்கத்தில் உருவாகியுள்ள படம் ‘மட்கா’. இந்தப் படத்தை வைரா என்டர்டெயின்மென்ட்ஸ் மற்றும் எஸ்ஆர்டி என்டர்டெயின்மென்ட் நிறுவனங்க இணைந்து தயாரிக்கின்றது. நடிகர் வருண் தேஜ் நடிப்பில் இதுவரை வெளியான படங்களிலேயே இதுதான் மிகப்பெரிய பட்ஜெட் என்று தெரிவிக்கப்பட்டுள்ளது. மிகப் பெரிய பட்ஜெட்டில் பான் இந்திய படமாக உருவாகியுள்ளது. வருண் தேஜ் உடன் இந்தப் படத்தில் மீனாட்சி சவுத்ரி, நோரா ஃபதேஹி, சலோனி, நவீன் சந்திரா, அஜய் கோஷ், ரவீந்திர விஜய், கன்னட கிஷோர், பி ரவிசங்கர் மற்றும் பலர் நடித்துள்ளனர். இந்தப் படத்திற்கு இசையமைப்பாளர் ஜி.வி.பிரகாஷ் குமார் இசையமைத்துள்ளார். இந்த நிலையில் இந்தப் படம் நாளை 14-ம் தேதி திரையரங்குகளில் வெளியாகவுள்ளது.