‘தக் லைஃப்’ ஷூட்டிங் ஸ்பாட்டில் விபத்து… பிரபல நடிகருக்கு காலில் எலும்புமுறிவு!

தக் லைஃப்

‘தக் லைஃப்’ படத்தின் படப்பிடிப்பில் ஏற்பட்ட விபத்தில் பிரபல நடிகர் ஜோஜூ ஜார்ஜிற்கு காலில் எழும்பு முறிவு ஏற்பட்ட சம்பவம் பரபரப்பை ஏற்படுத்தியுள்ளது. இயக்குநர் மணிரத்னம் இயக்கத்தில் நடிகர் கமல் ஹாசன் நாயகனாக நடித்து வரும் படம் ‘தக் லைஃப்’. இந்தப் படத்தில் முக்கிய கதாபாத்திரத்தில் சிம்பு, திரிஷா, அசோக் செல்வன், ஐஸ்வர்யா லட்சுமி, ஜோஜூ ஜார்ஜ் இந்தி நடிகர் அலிஃபஸல், அபிராமி என மிகப்பெரிய நட்சத்திர பட்டாளமே நடிக்கிறது. ஏ.ஆர்.ரஹ்மான் இசையமைக்கும் இந்தப் படத்துக்கு ரவி.கே.சந்திரன் ஒளிப்பதிவு செய்கிறார். செர்பியாவில் சமீபத்தில் முடிந்த இதன் படப்பிடிப்பு மக்களவை தேர்தலுக்கு பின்பு மீண்டும் பரபரப்பாகத் தொடங்கியது. ஏற்கனவே ராஜஸ்தான், டெல்லி, கேரளா உள்ளிட்ட பல இடங்களில் படப்பிடிப்பை நடத்திய படக்குழு, தற்போது புதுச்சேரியில் படப்பிடிப்பை நடத்தி வருகிறார்கள்.

கமல்ஹாசன், வில்லன்களுடன் மோதும் அதிரடி காட்சிகள் படமாக்கப்பட்டு வருவதாக கூறப்படுகிறது. இந்நிலையில் புதுவையில் ல் நடிகர் ஜோஜூ ஜார்ஜ் ஹெலிகாப்டரில் இருந்து குதிக்கும் காட்சி படமாக்கப்பட்ட போது, ஜோஜு ஜார்ஜ் விபத்தில் சிக்கியுள்ளார். இந்த விபத்தில் அவருக்கு காலில் எலும்பு முறிவு ஏற்படவே, உடனடியாக அவருக்கு முதலுதவி சிகிச்சை அளித்து பின்னர் மருத்துவமனையில் அனுமதித்துள்ளனர்.

Also read… Darshan : கொலை வழக்கு.. கன்னட நடிகர் தர்ஷன் சினிமாவில் நடிக்க தடையா?

தொடர்ந்து 2 வாரங்கள் ஓய்வு எடுக்குமாறு மருத்துவர்கள் கூறியதாக தகவல் வெளியாகியுள்ளது. இதையடுத்து கொச்சி சென்றுள்ள நடிகர் ஜோஜூ ஜார்ஜ் ஓய்வில் உள்ளதாக கூறப்படுகிறது. மேலும், ஜோஜூ ஜார்ஜ் கையில் ஸ்டிக் வைத்து நடந்து வரும் புகைப்படத்தை ரசிகர்கள் சமூக வலைதளங்களில் ஷேர் செய்து வருகின்றனர்.

ஜோஜூ ஜார்ஜ் ஹீரோ, வில்லன், காமெடி என எல்லா விதமான கதாபாத்திரங்களிலும் தன்னை கச்சிதமாக பொருத்தி நடிக்கக்கூடிய திறனுள்ளவர். ஜெகமே தந்திரம் படத்தில் தனுஷிற்கு வில்லனாக நடித்துள்ளார். ஜோசப் , நயட்டு  , சோழா , இரட்டா  போன்ற பல சிறப்பான படங்களில் நடித்துள்ளார். ரசிகர்கள் பலர் விரைவில் ஜோஜூ ஜார்ஜ் உடல்நிலை குணமாக வேண்டும் என தங்களின் வாழ்த்துக்களை தெரிவித்து வருகிறார்கள். மேலும் அடுத்த கட்ட படப்பிடிப்பை படக்குழுவினர் ஐரோப்பாவில்  நடத்த திட்டமிட்டுள்ளனர் என்பது குறிப்பிடத்தக்கது.