Prabhas: ”நீங்க இல்லனா நான் ஜீரோ” – ரசிகர்களுக்கு நன்றி சொன்ன பிரபாஸ்… வைரலாகும் வீடியோ!

கல்கி 2898 AD படத்தின் வெற்றியைத் தொடர்ந்து நடிகர் பிரபாஸ் வெளியிட்டுள்ள வீடியோ தற்போது இணையத்தில் தீயாய் பரவி வருகின்றது. பாகுபலி படங்களின் பிரம்மாண்ட வெற்றி தொடர்ந்து தெலுங்கு நடிகர் பிரபாஸ் பான் இந்தியா நட்சத்திரமாக மாறினார். பாகுபலி படத்திற்கு பின்னர் வெளிவந்த சாஹோ, ராதே ஷ்யாம் படங்கள் தோல்வியை சந்தித்தன. அதன் பின்னர் வெளிவந்த ஆதிபுரூஷ் திரைப்படமும் எதிர்பார்த்த வெற்றியை கொடுக்கவில்லை. அதனை தொடர்ந்து கேஜிஎப் பட இயக்குனர் பிரசாந்த் நீல் இயக்கத்தில் வெளியான சலார் திரைப்படம் பிரபாஸிற்கு ரசிகர்களிடையே கவனத்தை கொடுத்தது. இந்நிலையில் நாக் அஸ்வின் இயக்கத்தில் நடிகர் பிரபாஸ் நடித்துள்ள திரைப்படம் ‘கல்கி 2898 ஏ.டி’. இந்தப் படம் கடந்த மாதம் 27-ம் தேதி திரையரங்குகளில் வெளியானது.

இப்படத்தின் கதை 6000 ஆண்டுகள் நடக்கும் விஷயங்களை பேசுவதாக இயக்குநர் நாக் அஸ்வின் கூறியிருந்தார். படம் ரூ.600 கோடிக்கும் அதிகமான பட்ஜெட்டில் பிரமாண்டமாக உருவானது. ஒரே நேரத்தில் இந்தியிலும், தெலுங்கிலும் படமாக்கப்பட்ட இந்தப் படத்திற்கு சந்தோஷ் நாராயணன் இசையமைத்துள்ளார். இந்தப் படத்தில் அமிதாப் பச்சன், கமல்ஹாசன், தீபிகா படுகோனே, பசுபதி, திஷா பதானி, அன்னா பென் உள்ள பலர் நடித்துள்ளனர். வைஜெயந்தி மூவிஸ் தயாரித்துள்ள இந்தப் படம், பான் இந்தியா முறையில் உருவானது. அறிவியல் புனைவு திரைப்படமான இதில் பிரபாஸின் அறிமுக வீடியோ சில மாதங்களுக்கு முன் வெளியாகி வரவேற்பை பெற்றது.

பொதுவாகவே பெரிய பட்ஜெட் படங்களை நெட்பிளிக்ஸ் நிறுவனம் அதிக தொகை கொடுத்து வாங்கிவிடும். ஆனால், பொன்னியின் செல்வன் போன்ற பீரியாடிக் படங்களை அமேசான் பிரைம் தான் வாங்கி வருகிறது. இந்நிலையில், கல்கி 2898 ஏடி திரைப்படத்தையும் பெரிய தொகை கொடுத்து அமேசான் பிரைம் நிறுவனம் கைப்பற்றியுள்ளது. தியேட்டரில் படம் ஓடிக்கொண்டிருக்கும் போதே டிஜிட்டல் பார்ட்னர் அமேசான் பிரைம் என அதிகாரப்பூர்வமாக அறிவித்து விட்டனர்.

Also read… Cinema Rewind: ரகுவரன் ’அஞ்சலி’ படத்திற்காக இவ்வளவு மெனக்கெட்டாரா? நடிகை ரேவதி சொன்ன சுவாரஸ்ய தகவல்

மகாபாரதத்தையும், கல்கி அவதாரத்தையும் கலந்து கட்டி ஒரு புதுக்கதையை நாக் அஸ்வின் ஹாலிவுட் ஸ்டைலில் கொடுத்திருக்கும் படம் தான் கல்கி 2898 ஏடி. இந்த படமே வெறும் அறிமுகம் தான். அடுத்த பாகத்தில் தான் கல்கி அவதாரமே வரும் என படம் பார்த்தவர்கள் தெரிவித்துள்ளனர். மேலும் கல்கி 2898ஏடி படம் அருமை. பிரபாஸின் நடிப்பு சிறப்பு. அமிதாப் பச்சன், கமல் ஹாசன் தீயாக நடித்திருக்கிறார். இந்திய சினிமாவில் மறக்க முடியாத படமாக இருக்கிறது எனவும் சமூக வலைதளத்தில் பதிவிட்டுள்ளனர்.

இந்நிலையில், ரூ.600 கோடி பட்ஜெட்டில் உருவானதாக கூறப்படும் முதல் நாளில் உலக அளவில் ரூ.191 கோடியும், இரண்டாம் நாளில் மொத்தம் ரூ.295.5 கோடி வரை வசூலித்ததாக அறிவிக்கப்பட்டது. தற்போது இந்தப் படம் வெளியாகி 15 நாட்களில் உலகம் முழுவதும் ரூ.1000 கோடி வசூலை ஈட்டியுள்ளதாக அறிவிக்கப்பட்டுள்ளது.

A sweet note from our Bhairava, Karna a.k.a #Prabhas, as we celebrate the blockbuster success of #Kalki2898AD ❤️

– https://t.co/KTw6Mnkl7w#EpicBlockbusterKalki @SrBachchan @ikamalhaasan @deepikapadukone @nagashwin7 @DishPatani @Music_Santhosh @VyjayanthiFilms @Kalki2898AD… pic.twitter.com/7U5R0qr7Jo

— Vyjayanthi Movies (@VyjayanthiFilms) July 14, 2024

இதனை தொடர்ந்து ரசிகர்களுக்கு நடிகர் பிரபாஸ் நன்றி தெரிவித்து வீடியோ ஒன்றை வெளியிட்டுள்ளார். இதனை படத்தின் தயாரிப்பு நிறுவனமான மூவிஸ் தன்னுடைய எக்ஸ் தள பக்கத்தில் பதிவிட்டுள்ளது. அதில், படத்தின் வெற்றிக்கும் நன்றி தெரிவித்துள்ள பிரபாஸ், ரசிகர்கள் இல்லாவிட்டால் தான் ஜீரோ என்று கூறியுள்ளார். இந்தப் படத்தின் பிரம்மாண்டத்திற்கு காரணமான தயாரிப்பாளர்களுக்கும் அவர் நன்றி தெரிவித்துள்ளார். இந்தப் படத்தை காட்டிலும் இரண்டாவது பாகம் மேலும் பிரம்மாண்டமாக உருவாகவுள்ள குறித்தும் பிரபாஸ் உற்சாகம் தெரிவித்துள்ளார். இந்த வீடியோ தற்போது இணையத்தில் வைரலாகி வருகின்றது.