Today’s Cinema News: பாடலாசிரியரான தனுஷ் மகன்.. கோட் படத்தில் சர்ப்ரைஸ்.. இன்றைய டாப் சினிமா செய்திகள்!

கோப்பு புகைப்படம்

இன்றைய சினிமா செய்திகள்:  பொழுதுபோக்கு விஷயத்தில் முதல் இடத்தில் இருக்கும் சின்னத்திரை, பெரிய திரை ஆகிய இரண்டிலும் தினம்தோறும் ஏகப்பட்ட விஷயங்கள் நடைபெற்று வருகிறது.  இன்றைய நாளில் (ஆகஸ்ட் 27) இந்திய சினிமா, தமிழ் சினிமா மற்றும் சின்னத்திரையில் நடைபெற்ற சில முக்கியச் செய்திகளை தொகுப்பாக நாம் காணலாம். இதில் கோட் படத்தின் அப்டேட், தமிழில் அறிமுகமாகும் ஸ்ரீலீலா, பாடலாசிரியரான தனுஷின் மூத்த மகன் என இன்றைய நாளின் முக்கியமான சினிமா செய்திகளை காணலாம்.

• பாடலாசிரியராக அறிமுகமாகும் தனுஷின் மூத்த மகன் – விரைவில் பாடல் ரிலீஸ்

தமிழ் சினிமாவின் பன்முக திறமையாளராக அறியப்படுபவர் தனுஷ். இவர் பவர் பாண்டி, ராயன் என இரண்டு படங்களை இயக்கியுள்ளார். அடுத்ததாக இளம் நடிகர்களை வைத்து நிலவுக்கு என் மேல் என்னடி கோபம் என்ற படத்தை இயக்கி வருகிறார். இந்த படத்தின் முதல் பாடல் விரைவில் வெளியாகவுள்ளது. நடிகை பிரியங்கா மோகன் கேமியோ ரோலில் நடித்திருக்கும் இப்பாடலை தனுஷின் மூத்த மகன் யாத்ரா எழுதியுள்ளதாக தெரிவிக்கப்பட்டுள்ளது. ஜி.வி.பிரகாஷ் இப்படத்துக்கு இசையமைக்கிறார்.

• நாளை முதல் சூப்பர் ஸ்டார் பட அப்டேட் – உற்சாகத்தில் ரசிகர்கள் 

லோகேஷ் கனகராஜ் இயக்கத்தில் நடிகர் ரஜினிகாந்த் நடித்து வரும் கூலி படத்தில் இடம்பெற்றுள்ள நடிகர்கள் நாளை முதல் அறிமுகம் செய்யப்பட உள்ளார்கள். சன் பிக்சர்ஸ் தயாரிக்கும் இப்படத்தில் கன்னட நடிகர் உபேந்திரா, ஸ்ருதி ஹாசன், சத்யராஜ் உள்ளிட்ட பலரும் நடிக்கின்றனர். அனிருத் இசையமைக்க உள்ளார்.

• வாழை பட சக்ஸஸ் மீட் – கேக் வெட்டி கொண்டாடிய படக்குழு 

மாரி செல்வராஜ் இயக்கத்தில் சமீபத்தில் வெளியான படம் வாழை. நிகிலா விமல், கலையரசன், திவ்யா துரைசாமி உள்ளிட்ட பலரும் நடித்திருந்த இப்படம் உண்மை சம்பவத்தை அடிப்படையாக கொண்டு எடுக்கப்பட்டது. சந்தோஷ் நாராயணன் இசையமைத்த இப்படம் பலராலும் பாராட்டப்பட்டு வருகிறது. இதனிடையே இப்படத்தின் சக்ஸஸ் மீட் இன்று நடைபெற்றது. படத்தில் இடம்பெற்ற 2 சிறுவர்கள் கேக் வெட்டி மகிழ்ச்சியை வெளிப்படுத்தினர்.

• விஜய் ரசிகர்களுக்கு இன்ப அதிர்ச்சி – கோட் படத்தில் காத்திருக்கும் சர்ப்ரைஸ் 

வெங்கட் பிரபு இயக்கத்தில் விஜய் நடிப்பில் ஏஜிஎஸ் நிறுவனம் தயாரிப்பில் செப்டம்பர் 5 வெளியாகவுள்ள படம் “தி கோட்”. இந்த படத்தில் பிரஷாந்த், சினேகா, லைலா, அஜ்மல், பிரபுதேவா, ஜெயராம், மீனாட்சி சௌத்ரி, யோகிபாபு, பிரேம்ஜி உள்ளிட்ட பலரும் நடித்துள்ளனர். யுவன் ஷங்கர் ராஜா இசையமைக்கும் இப்படம் மிகப்பெரிய எதிர்பார்ப்புக்கிடையே வெளியாகவுள்லது. இதனிடையே 2 மணி 58 நிமிடம் ஓடக்கூடியதாக சொல்லப்பட்ட கோட் படத்தின் நேரம் இன்று மாற்றப்பட்டு 3.03 மணி நேரமாக மாறியுள்ளது. படத்தில் சொதப்பிய காட்சிகள் வீடியோவாக இணைக்கப்பட்டுள்ளது.

• தனுஷூடன் இணையும் நித்திலன் சுவாமிநாதன் – எதிர்ப்பார்ப்பில் தமிழ் திரையுலகம் 

தமிழ் சினிமாவில் குரங்கு பொம்மை மற்றும் மகாராஜா என வித்தியாசமான படங்களை இயக்கி முன்னணி இயக்குநராக உயர்ந்தவர் நித்திலன் சுவாமிநாதன். இவர் அடுத்ததாக நடிகர் தனுஷூடன் ஒரு படத்தில் இணைய உள்ளார். இதற்கான கதையை தனுஷிடம் நித்திலன் சொன்னதாகவும், ஏற்கனவே கமிட் ஆகியுள்ள படத்தை முடித்த பிறகு படம் பண்ணலாம் என உறுதியளித்ததாகவும் சொல்லப்படுகிறது.

• கோலிவுட்டில் ஹீரோயினாக அறிமுகமாகும் ஸ்ரீலீலா.. யாருக்கு ஜோடி தெரியுமா? 

தெலுங்கு திரையுலகின் முன்னனி நடிகையாக ஸ்ரீலீலா தமிழ் படத்தில் ஹீரோயினாக அறிமுகமாகவுள்ளார். சூரரைப்போற்று படத்துக்குப் பின் சூர்யாவை வைத்து இயக்குநர் சுதா கொங்காரா புறநானூறு படத்தை இயக்குவதாக இருந்தது. ஆனால் அதிலிருந்து சூரியா விலகியுள்ள நிலையில் தற்போது சிவகார்த்திகேயன் ஹீரோவாக நடிக்கிறார். இப்படத்தில் தான் ஸ்ரீலீலா நடிக்கவுள்ளார்.

• கோட் படத்தின் 4ஆம் பாடல் எப்போது ரிலீஸ் தெரியுமா? 

வெங்கட் பிரபு இயக்கத்தில் விஜய் நடிப்பில் வெளியாகவுள்ள படம் “தி கோட்”. செப்டம்பர் 5 ஆம் தேதி ரிலீசாகும் என தெரிவிக்கப்பட்டுள்ள இப்படத்தில் ஏற்கனவே 3 பாடல்கள் வெளியாகி விட்டது. இதனிடையே 4 ஆம் பாடல் வரும் ஆகஸ்ட் 31 ஆம் தேதி யுவன் ஷங்கர் ராஜா பிறந்தநாளன்று வெளியாகும் என எதிர்பார்க்கப்படுகிறது. இப்பாடலில் விஜய்யுடன் நடிகை திரிஷா கேமியோ கேரக்டரில் தோன்றியுள்ளதாக சொல்லப்படுகிறது.

• அட்டக்கத்தி தினேஷ் – ஹரிஷ் கல்யாண் கூட்டணியில் உருவாகும் “லப்பர் பந்து” 

தமிழரசன் பச்சமுத்து இயக்கத்தில் ஹரிஷ் கல்யாண், அட்டகத்தி தினேஷ் உள்ளிட்ட பலரும் நடித்துள்ள படம் லப்பர் பந்து. இப்படம் செப்டம்பர் மாதம் வெளியாகும் என தெரிவிக்கப்பட்டுள்ள நிலையில் ஆகஸ்ட் 28 ஆம் தேதி ட்ரெய்லர் வெளியாகும் என அறிவிக்கப்பட்டுள்ளது.