Today’s Cinema News: சிம்பு செய்த நிதியுதவி.. ஒரே நாளில் 3 படங்களின் அப்டேட்.. இன்றைய டாப் சினிமா செய்திகள்!

கோப்பு புகைப்படம்

இன்றைய சினிமா செய்திகள்: சின்னத்திரை, பெரிய திரை ஆகிய இரண்டும் பொழுதுபோக்கு விஷயத்தில் முதல் இடத்தில் இருக்கும் அம்சங்களாகும். இந்த இரண்டு துறைகளிலும் தினம்தோறும் ஏகப்பட்ட விஷயங்கள் நடைபெற்று வருகிறது. இன்றைய நாளில் (செப்டம்பர் 10) இந்திய சினிமா, தமிழ் சினிமா மற்றும் சின்னத்திரையில் நடைபெற்ற சில முக்கியச் செய்திகளை தொகுப்பாக நாம் காணலாம். நடிகர் விஜய்யின் கோட் படம் வசூலில் சாதனை, சிவகார்த்திகேயன் பட அப்டேட், ஜெயம் ரவி பிறந்தநாள் ஸ்பெஷல், கடைசி உலகப்போர் ட்ரெய்லர் என பல தகவல்களை காணலாம்.

• ஜெயம் ரவியின் 44வது பிறந்தநாள்.. வெளியான 3 படங்களின் அப்டேட்.. குஷியில் ரசிகர்கள்

நடிகர் ஜெயம் ரவி இன்று தனது 44வது பிறந்த நாளை கொண்டாடினார். இதனை முன்னிட்டு அவர் நடித்து வரும் காதலிக்க நேரமில்லை படத்தின் மேக்கிங் வீடியோவை படக்குழு வெளியிட்டுள்ளது. அதேபோல் ஜீனி படத்தின் புதிய போஸ்டரும் வெளியாகியுள்ளது. மேலும் பிரதர் படத்தின் ப்ரோமோ ரீதியிலான வீடியோவை படக்குழு வெளியிட்டுள்ளது. அதேசமயம் நேற்று தனது மனைவி ஆர்த்தியை பிரிவதாக அனைவருக்கும் அதிர்ச்சி கொடுத்த ஜெயம் ரவி தனது பிறந்தநாளில் விவகாரத்து கோரி நீதிமன்றத்தில் மனுத்தாக்கல் செய்துள்ளதாக தெரிவிக்கப்பட்டுள்ளது.

• ஆந்திரா மற்றும் தெலுங்கானா மக்களுக்கு உதவ சிம்பு செய்த நிதியுதவி

சமீபத்தில் மழை மற்றும் வெள்ளத்தால் பாதிக்கப்பட்ட ஆந்திரா மற்றும் தெலுங்கானா மக்களுக்கு உதவ தெலுங்கு திரையுலகைச் சேர்ந்த பிரபலங்கள் முதலமைச்சர் நிவாரண நிதிக்கு ரூ.1 கோடி வழங்கினர். இந்த நிலையில் தமிழ் சினிமாவின் முன்னணி நடிகர் சிலம்பரசன் ரூபாய் 6 லட்சம் வழங்கியுள்ளார். தமிழ் சினிமாவில் இருந்து முதன்முதலில் வெள்ள பாதிப்புக்கு உதவியவர் சிம்பு தான் என்பது குறிப்பிடத்தக்கது.

• கார்த்திக் சுப்பராஜின் அடுத்த படத்தின் ஹீரோ யார் தெரியுமா? – வெளியான அப்டேட்!

தமிழ் சினிமாவில் விஜய் சேதுபதி, ரஜினிகாந்த், தனுஷ், ராகவா லாரன்ஸ், சித்தார்த் என பல முன்னணி நடிகர்களை வைத்து மாறுபட்ட படங்களை கொடுத்தவர் கார்த்திக் சுப்பராஜ். இவர் தற்போது நடிகர் சூர்யா நடிக்கும் 44 வது படத்தை இயக்கி வருகிறார். இந்த படத்தின் ஹீரோயினாக பூஜா ஹெக்டே நடிக்கிறார். இதன் படப்பிடிப்பு விறுவிறுப்பாக நடந்து வருகிறது. இந்நிலையில் கார்த்திக் சுப்பராஜ் அடுத்ததாக ஜெயம் ரவியை வைத்து படம் இயக்க உள்ளதாக தகவல் வெளியாகியுள்ளது. இந்தப் படத்தை அவரே சொந்தமாக தயாரிக்க உள்ளதாக தெரிவிக்கப்பட்டுள்ளது.

• கடைசி உலகப் போர் படத்தின் டிரைலர் நாளை வெளியீடு

இசையமைப்பாளரும் நடிகருமான ஹிப் ஹாப் தமிழா இயக்கி நடித்து வரும் கடைசி உலகப் போர் படத்தின் டிரைலர் நாளை மாலை 5 மணிக்கு வெளியாகும் என அறிவிக்கப்பட்டுள்ளது. இந்தப் படத்தில் வாணி போஜன், நட்டி, சிங்கம்புலி ,முனீஸ் காந்த், நாசர் உள்ளிட்ட பலரும் நடித்துள்ளனர். ஏற்கனவே மீசையை முறுக்கு படத்தையும் ஹிப் ஹாப் தமிழா இயக்கியுள்ளார். முன்னதாக இப்படத்தின் பாடல்கள் ரசிகர்களிடத்தில் நல்ல வரவேற்பை பெற்றது குறிப்பிடத்தக்கது.

• ரூ.300 கோடி வசூலை கடந்த தி கோட்.. சாதனைப் படைத்த நடிகர் விஜய்

ஏஜிஎஸ் நிறுவனம் தயாரிப்பில் வெங்கட் பிரபு இயக்கத்தில் நடிகர் விஜய் நடித்துள்ள தி கிரேட்டஸ்ட் ஆஃப் ஆல் டைம் படம் கடந்த செப்டம்பர் 5 ஆம் தேதி வெளியாகி வெற்றிகரமாக ஹவுஸ்புல் காட்சிகளாக ஓடிக்கொண்டிருக்கிறது. இப்படம் இதுவரை ரூ.300 கோடி வசூலை கடந்துள்ளதாக தகவல் வெளியாகி உள்ளது. இதன் மூலம் தொடர்ச்சியாக 8 படங்கள் ரூ.100 கோடிக்கு மேல் வசூலைப் பெற்றுள்ள நடிகர் என்ற சாதனையை நடிகர் விஜய் பெற்றுள்ளார். அதேசமயம்  நடிகர் விஜய் படம் முதன் முதலில் 300 கோடியை கடந்த பிகில் படமும் ஏஜிஎஸ் நிறுவனம் தான் தயாரித்திருந்தது என்பது குறிப்பிடத்தக்கது.

• சிவகார்த்திகேயன் கேரியரில் மிகச் சிறந்த பொழுதுபோக்க படமாக இருக்கும் – வெங்கட் பிரபு

சிவகார்த்திகேயனை வைத்து தான் இயக்கப் போகும் படத்தைப் பற்றிய அப்டேட்டை இயக்குனர் வெங்கட் பிரபு வெளியிட்டுள்ளார். அதன்படி இந்த படம் தான் இயக்கிய தி கோட் மற்றும் மாநாடு படங்களிலிருந்து மிகவும் வித்தியாசமாக இருக்கும் என தெரிவித்துள்ளார். நிச்சயம் இந்த படம் சிவகார்த்திகேயன் கேரியரில் மிகச் சிறந்த பொழுதுபோக்க படமாக இருக்கும் எனவும் அவர் குறிப்பிட்டுள்ளார்.