Today’s Cinema News: தனுஷ் பட பாடல்… கூலி ஸ்ருதி போஸ்டர்… டாப் சினிமா செய்திகள்!
இன்றைய சினிமா செய்திகள்: ரஜினியின் ‘கூலி’ படத்திலிருந்து வெளியானது நடிகை ஸ்ருதி ஹாசனின் அறிமுக போஸ்டர், தனுஷின் நிலவுக்கு என் மேல் என்னடி கோபம் படத்திலிருந்து வெளியான முதல் சிங்கிள் என இன்று ஆகஸ்ட் மாதம் 30-ம் தேதி சினிமாவில் நடந்த முக்கிய நிகழ்வுகள் சில.
சினிமா செய்திகள்
இன்றைய சினிமா செய்திகள்: ரஜினியின் ‘கூலி’ படத்திலிருந்து வெளியானது நடிகை ஸ்ருதி ஹாசனின் அறிமுக போஸ்டர், தனுஷின் நிலவுக்கு என் மேல் என்னடி கோபம் படத்திலிருந்து வெளியான முதல் சிங்கிள் என இன்று ஆகஸ்ட் மாதம் 30-ம் தேதி சினிமாவில் நடந்த முக்கிய நிகழ்வுகள் சில.
ராஜுமுருகனின் ‘பராரி’ பட டீசர்!
இயக்குநர் ராஜுமுருகனின் தயாரிப்பில் உருவான ‘பராரி’ படத்தின் டீசர் வெளியாகி இணையத்தில் கவனம் பெற்று வருகின்றது. குக்கூ, ஜோக்கர், ஜிப்ஸி, ஜப்பான் போன்ற பல படங்களை இயக்கிய இயக்குநர் ராஜு முருகன், எஸ்பி சினிமாஸ் நிறுவனத்துடன் இணைந்து வழங்கும் படம் ‘பராரி’. ஹரிஷங்கர், சங்கீதா கல்யாண் நடிப்பில் எழில் பெரியவேடி இயக்கத்தில் உருவாகியுள்ள படம் பராரி. இப்படத்தின் இயக்குநர் எழில் பெரியவேடி ராஜு முருகனின் உதவி இயக்குநர் என்பது குறிப்பிடதக்கது. ஷான் ரோல்டன் இசையமைக்க இந்த படத்திற்கு சாம் RDX படத்தொகுப்பு செய்துள்ளார். ஸ்ரீதர் ஒளிப்பதிவு செய்துள்ளார்.
ஹேமா கமிட்டி போன்ற குழு தமிழ் சினிமாவில் அமைக்கப்படும்
கேரள அரசு நியமித்த ஹேமா கமிட்டி போல தமிழ் சினிமாவில் உள்ள பெண் நடிகைகளுக்காக விரைவில் கமிட்டி அமைக்கப்படும் என்று நடிகர் விஷால் உறுதி அளித்துள்ளார். மலையாள சினிமா துறையில் ஹேமா கமிட்டி அறிக்கை வெளியான பிறகு பல நடிகைகள் தங்களுக்கு நடந்த பாலியல் துன்புறுத்தல்கள் குறித்து வெளிப்படையாக பேசி வருகின்றனர். இது குறித்து செய்தியாளர்களை சந்தித்த நடிகர் விஷாலிடம் கேள்வி எழுப்பப்பட்டப்போது தமிழ்நாட்டிலும், நடிகர் சங்கம் சார்பில் ஹேமா கமிட்டியைப்போல குழு ஒன்றை அமைத்து விசாரணை செய்ய வேண்டும். அதை அமைக்க வேண்டியது எங்களின் கடமை. நடிகர் சங்கம் என்பது ஆண்களுக்கு மட்டும் கிடையாது. அதில் பெண்களும் உள்ளார்கள். அந்த குழு குறித்த அறிவிப்பு விரைவில் வெளியாகும் என தெரிவித்தார்.
யாருக்கும் எதிரான படமல்ல ’ஆடுஜீவிதம்’!
நடிகர் பிருத்விராஜ் நடிப்பில் வெளியான ஆடுஜீவிதம் திரைப்படம் தனிப்பட்ட நபரையோ, இனத்தையோ, நாட்டையோ, நம்பிக்கைகளையோ புண்படுத்தும் நோக்கில் எடுக்கப்படவில்லை என்று இயக்குநர் பிளஸ்ஸி தெரிவித்துள்ளார். ஆடு ஜீவிதம் திரைப்படம் கடந்த மார்ச் 28-ம் தேதி திரையரங்குகளில் வெளியானது. கேரளாவைச் சேர்ந்த நஜீப் வேலைக்காக அரபு நாடுக்குச் சென்று, அங்குள்ள முதலாளியால் ஏமாற்றப்பட்டு ஆடு மேய்க்கப் பணிக்கப்படுகிறார். பாலைவனத்தில் 700 ஆடுகளுடன் தன்னந்தனியாக வசிக்க நேர்கிறது. ஒருகட்டத்தில் தன்னையும் ஒரு ஆடாக கருதிக் கொள்ளும் அளவுக்கு மனதளவிலும், உடலளவிலும் நிலைமை மோசமாகிறது. இந்த கடின காலத்தைத் தாண்டி எப்படி நஜீப் உயிர் பிழைத்தார் என்ற உண்மைச் சம்பவத்தை பென்யாமின் ஆடு ஜீவிதம் என்ற நாவலாக எழுத, அதனடிப்படையில் பிளஸ்ஸி ஆடு ஜீவிதம் திரைப்படத்தை இயக்கியுள்ளார்.
‘நிலவுக்கு என் மேல் என்னடி கோபம்’ படத்தின் முதல் சிங்கிள்
தனுஷ் இயக்கத்தில் உருவாகியுள்ள ‘நிலவுக்கு என் மேல் என்னடி கோபம்’ படத்தின் முதல் பாடலின் லிரிக்கள் வீடியோவை படக்குழு வெளியிட்டுள்ளது. நடிகரான தனுஷ், ‘பவர் பாண்டி’ படத்தின் மூலம் இயக்குநராக அவதாரம் எடுத்தார். அடுத்து அவர் இயக்கிய ‘ராயன்’ படம் சமீபத்தில் வெளியாகி நல்ல வரவேற்பை பெற்றது. இந்தப் படங்களைத் தொடர்ந்து தனுஷ் இயக்கத்தில் 3-ஆவதாக திரையரங்குகளில் வெளியாக உள்ள படத்துக்கு ‘நிலவுக்கு என் மேல் என்னடி கோபம்’ என தலைப்பிடப்பட்டுள்ளது. இப்படத்தில் தனுஷின் சகோதரி மகன் பவிஷ் ஹீரோவாக அறிமுகமாகிறார். மேலும், விஸ்வாசம் படம் மூலம் பிரபலமடைந்த அனிகா சுரேந்திரன், ப்ரியா வாரியர், மேத்யூ தாமஸ் உள்ளிட்ட பலர் இப்படத்தில் நடித்துள்ளனர். இளைஞர்களின் காதல் கதையை மையமாகக் கொண்டு உருவாகும் இப்படத்தின் முதல் சிங்கிள் ‘கோல்டன் ஸ்பாரோ’ பாடலை படக்குழு தற்போது வெளியிட்டுள்ளது. இப்பாடலில் பிரபல நடிகை ப்ரியங்கா மோகன் நடனமாடியுள்ளார்.
கோழைத்தனம் என விமர்சித்த நடிகை பார்வதி
தொடர் பாலியல் புகார் எதிரொலி காரணமாக மலையாள நடிகர் சங்கமான அம்மா அமைப்பில் இருந்து மோகன்லால் உள்ளிட்ட நிர்வாகிகள் ராஜினாமா செய்தது கோழைத்தனமா செயல் என்று நடிகை பார்வதி விமர்சித்துள்ளார். தென்னிந்திய சினிமா மட்டும் இல்லாமல், ஒட்டுமொத்த இந்திய சினிமாவும் தற்போது மிகவும் பரபரப்பாக பேசும் பிரச்னை என்ன என்றால் அது மலையாள சினிமா உலகில் நடைபெற்ற நடிகைகளுக்கு எதிரான பாலியல் தொல்லை பிரச்னைதான். இந்த நிலையில் மலையாள திரைப்பட கலைஞர்கள் சங்கமான ‘அம்மா’ (AMMA) அமைப்பின் தலைவர் பொறுப்பிலிருந்து நடிகர் மோகன்லால் ராஜினாமா செய்தார். மேலும் செயற்குழு உறுப்பினர்கள் அனைவரும் கூண்டோடு ராஜினாமா செய்தனர். ஹேமா கமிட்டி அளித்த விசாரணை அறிக்கை அனைவரையும் அதிர்ச்சியில் ஆழ்த்தியது என்றால், மோகன் லால் தனது பதவியை ராஜினாமா செய்ததும் பெரும் அதிர்ச்சியை ஏற்படுத்தியது. அம்மா அமைப்பு நிர்வாகிகளின் இந்த செயல் குறித்து கருத்து தெரிவித்துள்ள நடிகை பார்வதி இதனை கோழைத்தனமான செயல் என்று விமர்சித்துள்ளார்.
கூலி படத்தில் இருந்து ஸ்ருதிஹாசனின் அறிமுக போஸ்டர்
நடிகர் ரஜினியின் கூலி படத்தில் இருந்து நடிகை ஸ்ருதி ஹாசனின் அறிமுக போஸ்டரைப் படக்குழு வெளியிட்டுள்ளது. தனது 171-வது படத்தில் கமிட்டாகி விறுவிறுப்பாக படத்தின் வேலையில் இறங்கியுள்ளார் ரஜினிகாந்த். நடிகர் ரஜினி நடிக்கும் இந்தப் படத்தை இயக்குநர் லோகேஷ் கனகராஜ் இயக்குகிறார். இந்தப் படத்திற்கு ‘கூலி’ என பெயர் வைக்கப்பட்டுள்ளது. அன்பறிவு ஸ்டண்ட் இயக்குநர்களாக பணியாற்றுகின்றனர். அனிருத் இசையமைக்கும் இப்படம் அடுத்த ஆண்டு திரைக்கு வர உள்ளது குறிப்பிடத்தக்கது. விறுவிறுப்பாக உருவாகி வரும் இந்த திரைப்படத்தில் நடிக்கும் நடிகர்களின் அறிமுக போஸ்டர் கடந்த 28-ம் தேதியில் இருந்து படக்குழு வெளியிட்டு வருகிறது. அந்த வகையில் முன்னதாக மலையாள நடிகரான சௌபின் ஷாகிரின் போஸ்டரைப் படக்குழு வெளியிட்டது. இவரைத் தொடர்ந்து டோலிவுட்டின் சூப்பர் ஸ்டார் நடிகர் நாகர்ஜுனாவின் போஸ்டரைப் படக்குழு வெளியிட்டது. இந்த நிலையில் இன்று நடிகை ஸ்ருதி ஹாசனின் அறிமுக போஸ்டரைப் படக்குழு வெளியிட்டுள்ளது.
மணமகன் கெட்டப்பில் ஊர்வலம் வந்த நாக சைதன்யா
நடிகை சமந்தாவை விவாகரத்து செய்த ஒரே வருடத்தில், நடிகை சோபிதா துலிபாலாவுடன் டேட்டிங் செய்ய துவங்கிய நாக சைதன்யா, பெற்றோர் சம்மதத்துடன் தன்னுடைய இரண்டாவது திருமணத்திற்கும் தயாராகி உள்ளார். இவர்களின் திருமணத்தை உறுதி படுத்தும் விதமாக கடந்த ஆகஸ்ட் 8-ஆம் தேதி, இவர்களின் திருமண நிச்சயதார்த்தம் மிகவும் எளிமையான முறையில் நாகர்ஜூனாவின் வீட்டில் நடந்தது. இந்த நடிகர் நாக சைதன்யா, மணமகன் கெட்டப்பில் மேள தாளங்களுடன் மாப்பிள்ளை ஊர்தியில் வலம் வரும் வீடியோ வெளியாகி, நாக சைத்தாயா – சோபிதாவுக்கு ரகசிய திருமணமா நடந்து விட்டதா? என்கிற சந்தேகத்தை ரசிகர்களுக்கு எழ வைத்துள்ளது.
பிக்பாஸ் சீசன் 8 தொகுத்து வழங்கும் விஜய் சேதுபதி
பிக்பாஸ் சீசன் 8 நிகழ்ச்சி, அக்டோபர் மாதம் துவங்க உள்ளதாக கூறப்படும் நிலையில், தற்போது பிக்பாஸ் சீசன் 8 ப்ரோமோ ஷூட்டிங் விஜய் சேதுபதியை வைத்து பரபரப்பாக நடந்து வருவதாக தகவல் வெளியாகி உள்ளது. கமலஹாசன் கடந்த மாதம் பிக்பாஸ் நிகழ்ச்சியில் இருந்து திடீர் என விலகுவதாக அறிவித்தார். ஏ ஐ தொழில்நுட்பம் குறித்து படிப்பதற்காக அவர் அமெரிக்கா செல்ல உள்ளதால், பிக்பாஸ் நிகழ்ச்சியில் இருந்து விலகுவதாக கூறப்பட்டது. கமலஹாசன் பிக்பாஸ் நிகழ்ச்சியில் இருந்து விலகியதால், அவருடைய இடத்தை பிடிக்கப் போவது யார் என்கிற மிகப்பெரிய எதிர்பார்ப்பு நிலவியது. அதன்படி விஜய் சேதுபதி பிக்பாஸ் சீசன் 8 நிகழ்ச்சியை தொகுத்து வழங்குவது கிட்டத்தட்ட உறுதியான நிலையில், தற்போது பிக்பாஸ் புரோமோ ஷூட்டிக் விஜய் சேதுபதியை வைத்து பாண்டிச்சேரியில் விறுவிறுப்பாக நடந்து வருவதாக தகவல் வெளியாகியுள்ளது.