Today’s Cinema News: நடிகர் டெல்லி கணேஷ் மரணம் முதல் 200 கோடி கடந்த அமரன் வசூல் வரை… டாப் சினிமா செய்திகள்!

இன்றைய சினிமா செய்திகள்: உடல் நலக்குறைவு காரணமாகவும் வயது முதிர்வு காரணமாகவும் பிரபல மூத்த நடிகர் டெல்லி கணேஷ் தூக்கத்திலேயே உயிரிழந்தது முதல் நடிகர் சிவகார்த்திகேயனின் நடிப்பில் தீபாவளி பண்டிகையை முன்னிட்டு வெளியான அமரன் படம் 200 வசூலித்தது வரை நவம்பர் மாதம் 10-ம் தேதி சினிமாவில் நடந்த முக்கிய நிகழ்வுகள் குறித்து சில.

மூத்த நடிகர் டெல்லி கணேஷ் காலமானார்!

உடல் நலக்குறைவு காரணமாகவும் வயது முதிர்வு காரணமாகவும் பிரபல மூத்த நடிகர் டெல்லி கணேஷ் தூக்கத்திலேயே உயிரிழந்துள்ளார். இந்திய விமானப்படையில் பணியாற்றிய டெல்லி கணேஷ் நடிப்பின் மீது இருந்த ஆர்வம் காரணமாக வேலையை விட்டுவிட்டு நடிப்பு துறைக்கு வந்தார். நாடக நடிகராக தனது நடிப்பைப் தொடங்கிய நடிகர் டெல்லி கணேஷ் காமெடி, வில்லன், குணசித்திரம் என சினிமாவில் கலக்கியுள்ளார். இயக்குநர் பாலசந்தரின் ’பட்டின பிரவேசம்’ படத்தின் மூலம் சினிமாவில் அறிமுகம் ஆனார். வெள்ளித்திரை மட்டும் இன்றி சின்னத்திரை, குறும்படம் ஆகியவற்றிலும் தனது சிறப்பான நடிப்பை வெளிப்படுத்தியுள்ளார் டெல்லி கணேஷ். 80 வயதான டெல்லி கணேஷ் நேற்று இரவு உடல்நலக்குறைவு காரணமான தூக்கத்திலேயே ராமநாதபுரத்தில் இருக்கும் அவரது இல்லத்தில் உயிரிழந்ததாக தகவல் வெளியாகியுள்ளது.

பிக்பாஸ் வீட்டை விட்டு இன்று வெளியேறப்போவது இவர்தானா?

தமிழ், தெலுங்கு, மலையாளம், கன்னடம் மற்றும் இந்தி என பல்வேறு மொழிகளில் நடைபெற்று வரும் இந்த நிகழ்ச்சியில் பல முன்னணி நட்சத்திரங்கள் இதுவரை தொகுத்து வழங்கி வந்துள்ளனர். கடந்த 7 சீசன்களாக நடிகர் கமல் ஹாசன் இந்த நிகழ்ச்சியை தொகுத்து வந்த நிலையில் அவர் நிகழ்ச்சியை விட்டு விலகிய பிறகு தற்போது விஜய் சேதுபதி இந்த 8-வது சீசனை தொகுத்து வழங்குகிறார். விஜய் டிவியின் பிக்பாஸ் நிகழ்ச்சி கடந்த 2017 ஆம் ஆண்டு முதல் ஒளிபரப்பாகி வருகிறது. கடந்த மாதம் 6-ம் தேதி பிக்பாஸ் தமிழ் 8-வது சீசன் தொடங்கியது. முதல் வார நாமினேஷனில் இடம் பிடித்த ரவீந்தர் குறைந்த வாக்குகள் பெற்றதன் அடிப்படையில் பிக்பாஸ் வீட்டை விட்டு வெளியேற்றப்பட்டார். அதனைத் தொடர்ந்து இரண்டாவது வாரம் அர்னவ் மூன்றாவது வாரம் தர்ஷா பிக்பாஸ் வீட்டை விட்டு வெளியேற்றப்பட்டனர். இந்த நிலையில் இன்று 5-வது வாரத்திற்கான எவிக்‌ஷனில் யார் வெளியேறப்போகிறார் என்பது குறித்த தகவல் தற்போது வெளியாகி வைரலாகி வருகின்றது. சுனிதா குறைவான வாக்குகள் பெற்று இன்று பிக்பாஸ் வீட்டை விட்டு வெளியேறப்போவதாக தகவல்கள் வெளியாகியுள்ளது.

’வேட்டையன்’ படத்திலிருந்து வெளியானது ‘வாள் வீசும்’ வீடியோ பாடல்

நடிகர் ரஜினியின் வேட்டையன் படத்தின் ‘வாள் வீசும்’ வீடியோ பாடலைப் படக்குழு வெளியிட்டுள்ளது. ஜெய் பீம் படத்தின் இயக்குநர் த.செ.ஞானவேல் இயக்கும் அந்தப் படத்தின் மீது உச்சக்கட்ட எதிர்பார்ப்பு ரசிகர்களிடம் இருக்கிறது. வேட்டையன் திரைப்படம், கடந்த மாதம் அக்டோபர் 10ஆம் தேதி திரையரங்குகளில் வெளியானது. இந்தப் படத்தில் அமிதாப்பச்சன், ஃபஹத் ஃபாசில், ராணா, மஞ்சு வாரியர், துஷாரா விஜயன், ரித்திகா சிங் உட்பட பலர் நடித்துள்ளனர். அனிருத் இசை அமைத்துள்ள இந்தப் படத்தை லைகா நிறுவனம் தயாரித்துள்ளது. ஆக்‌ஷன் த்ரில்லர் பாணியில் இந்தப் படம் வெளியானது. ‘வாள் வீசும்’ என்ற இந்தப் பாடலை யுகபாரதி எழுதியுள்ளார். அனிருத் இந்தப் பாடலைப் பாடியுள்ளார். பாடல் ரசிகர்களிடையே கவனம் பெற்று வருகின்றது.

ரூ. 200 கோடி வசூல் செய்து ’அமரன்’ படம் சாதனை

நடிகர் சிவகார்த்திகேயன் தற்போது தனது 21-வது படத்திற்காக இயக்குநர் ராஜ்குமார் பெரியசாமியுடன் கூட்டணி வைத்தார். இந்தப் படத்திற்கு ‘அமரன்’ என்று பெயர் வைத்தனர். சோனி பிக்சர்ஸுடன் இணைந்து இந்தப் படத்தை நடிகர் கமல்ஹாசனின் ராஜ்கமல் பிலிம்ஸ் இன்டர்நேஷனல் தயாரித்துள்ளது. இந்தப் படத்தில் சிவகார்த்திகேயன் ராணுவ வீரராக நடித்துள்ளார். அவருக்கு ஜோடியாக நடிகை சாய் பல்லவி நடித்துள்ளார். இசையமைப்பாளர் ஜி.வி.பிரகாஷ்குமார் இந்தப் படத்திற்கு இசை அமைத்துள்ளார். மறைந்த ராணுவ வீரர் மேஜர் முகுந்த் வரதராஜனின் வாழ்க்கையை மையமாக வைத்து இந்தப் படம் உருவாகியுள்ளது. தமிழில் மீண்டும் ஒரு தேசபக்தி படமாக உருவாகியுள்ள இந்தப் படத்தின் மீதான ரசிகர்களின் எதிர்பார்ப்பு அதிகரித்திருந்தது. இந்த நிலையில் படம் கடந்த 31-ம் தேதி தீபாவளி பண்டிகையை முன்னிட்டு திரையரங்குகளில் வெளியாகியுள்ளது. இதனைத் தொடர்ந்து படம் வெளியாகி 10 நாட்களை கடந்துள்ள நிலையில் படத்தின் வசூல் குறித்த படக்குழு அறிவித்துள்ளது. அதன்படி படம் உலகம் முழுவதும் ரூ. 200 கோடி வசூல் செய்துள்ளதாக படக்குழு அறிவித்துள்ளது.

வெளியானது ‘எமக்கு தொழில் ரொமான்ஸ்’ படத்தின் ஸ்னீக் பீக் வீடியோ

அசோக் செல்வன் நடிப்பில் முன்னதாக வெளியான ‘ப்ளூ ஸ்டார்’ திரைப்படம் ரசிகர்களிடையே நல்ல வரவேற்பை பெற்றது. அவர் நடிப்பில் அடுத்ததாக வெளியாக உள்ள படம் ‘எமக்குத் தொழில் ரொமான்ஸ்’. இந்தப் படத்தை அறிமுக இயக்குநர் பாலாஜி கேசவன் இயக்கியுள்ளார். அவந்திகா நாயகியாக நடித்துள்ள இப்படத்தில் எம்.எஸ்.பாஸ்கர், ஊர்வசி, அழகம்பெருமாள், பகவதி பெருமாள், விஜய் வரதராஜ், படவா கோபி உள்ளிட்ட பலர் நடித்துள்ளனர். இந்தப் படத்தின் ட்ரெய்லரை படக்குழு முன்னதாக வெளியிட்டது. ஒரு இளைஞனின் காதல், அதனால் ஏற்படும் பிரச்சனைகள், அவனுக்கு உதவும் குடும்பம், நண்பர்கள் என ரொமான்ஸ் காமெடி திரைப்படமாக இந்த படம் உருவாகியுள்ளது என ட்ரெய்லரை பார்க்கும் போது தெரிந்தது. இந்நிலையில் இந்த படத்தில் இருந்து முதல் ஸ்னீக் பீக் வீடியோவைப் படக்குழு வெளியிட்டுள்ளது.

Also read… இணையத்தை கலக்கும் நடிகை ரம்யா பாண்டியனின் கல்யாண போட்டோஸ்

‘லக்கி பாஸ்கர்’ படம் வசூல் செய்தது எவ்வளவு தெரியுமா?

நடிகர் தனுஷ் நடிப்பில் வெளியான ‘வாத்தி’ படத்தை இயக்கியதன் மூலம் கோலிவுட் ரசிகர்களின் கவனத்தைப் பெற்றவர் இயக்குநர் வெங்கி அட்லுரி. இதனைத் தொடர்ந்து இவர் துல்கர் சல்மானை வைத்து தற்போது ‘லக்கி பாஸ்கர்’ என்ற படத்தை இயக்கியுள்ளார். பான் இந்தியன் படமாக உருவாகியுள்ள இதில் துல்கர் சல்மான் உடன் இணைந்து மீனாட்சி சவுத்ரி நடிக்கிறார். ஜி.வி பிரகாஷ் இதற்கு இசை அமைக்கிறார். இந்த படத்தை சித்தாரா எண்டர்டெயின்மெண்ட் மற்றும் பார்ச்சூன் ஃபோர் சினிமா ஆகிய நிறுவனங்கள் இணைந்து தயாரித்துள்ளனர். இந்த நிலையில் படம் ரசிகர்களிடையே நல்ல வரவேற்பைப் பெற்று வருகிறது. படங்களுக்காக உடல் எடையை கூட்டுவது, குறைப்பது என பெரிய மெனக்கெடல் எதுவும் இல்லாமல் படங்களில் நடித்தாலும் தனது இயல்பான நடிப்பால் ரசிகர்களின் மனதில் நீங்காத இடம் பிடித்தவர் துல்கர். அந்த வகையில் இவரது நடிப்பில் தீபாவளி பண்டிகையை முன்னிட்டு வெளியான ‘லக்கி பாஸ்கர்’ நல்ல வரவேற்பைப் பெற்று வருகிறது. அதன்படி படம் தற்போது வரை உலகம் முழுவதும் 10 நாட்களில் ரூ.88.7 கோடிக்கு மேல் வசூலித்துள்ளதாக தயாரிப்பு நிறுவனம் அறிவித்துள்ளது. இந்த வார இறுதியில் இத்திரைப்படம் 100 கோடி வரை வசூலிக்கும் என்று எதிர்பாக்கப்படுகின்றது.

Also read… ராம் சரணின் ’கேம் சேஞ்சர்’ படத்தின் டீசர் இதோ!

புஷ்பா 2 படத்தில் ஸ்ரீலீலா நடனமாடும் பாடலின் பெயர் இதுதான்

இயக்குநர் சுகுமார் இயக்கத்தில் நடிகர்கள் அல்லு அர்ஜுன், ராஷ்மிகா மந்தனா, ஃபஹத் ஃபாசில், சுனில் உள்ளிட்டோர் நடித்து கடந்த 2021-ம் ஆண்டு வெளியான படம், ‘புஷ்பா: தி ரைஸ்’. இந்தப் படத்துக்கு தேவி ஸ்ரீ பிரசாத் இசை அமைத்திருந்தார். கூலித் தொழிலாளியாக வாழ்க்கையைத் தொடங்கும் புஷ்பா கதாபாத்திரம் எப்படி ஒரு கடத்தல் கும்பல் தலைவனாகிறது என்பதுதான் படத்தின் ஒன்லைன். இந்தப் படம் பெரும் வெற்றி பெற்றதுடன் ரூ.300 கோடிக்கு அதிகமாக வசூலித்து ஆச்சரியப்படுத்தியது. சமந்தாவின் ‘ஊ சொல்றியா மாமா’ பாடல் பட்டி தொட்டி எங்கும் அதிர்ந்தது. சமந்தா, ஓ சொல்றியா பாடலுக்கு மட்டும் வந்து ஓ சொல்லிவிட்டுப் போகிறார். படத்தின் இரண்டாம் பாதியில் பகத் பாஸில் வருகிறார். அது இப்படத்தின் இரண்டாம் பாகத்தின் துவக்கப் புள்ளியாக அமைகிறது. இந்த நிலையில் இந்தப் படத்தின் இரண்டாம் பாக பணிகள் விறுவிறுப்பாக நடைப்பெற்று வரும் நிலையில் படம் வருகின்ற டிசம்பர் 5-ம் தேதி வெளியாகும் என்று அறிவிக்கப்பட்டுள்ளது. இந்த நிலையில் இந்த பாகத்தில் நடிகை ஸ்ரீலீலா நடனமாட உள்ள பாடலின் பெயர் அறிவிக்கப்பட்டுள்ளது. அதன்படி, இப்பாடலுக்கு ‘கிஸ்சிக்’ என பெயரிடப்பட்டுள்ளது.

கங்குவா படத்தின் ரிலீஸ் ட்ரெய்லர் அப்டேட் இதோ!

சூர்யாவின் நடிப்பில் தற்போது உருவாகி ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ள படம் கங்குவா. இந்த படத்தினை இயக்குநர் சிறுத்தை சிவா இயக்குகின்றார். மன்னர் காலக் கதையைக் கொண்டு எடுக்கப்பட்டு வரும் இந்த படம்தான் சூர்யாவின் நடிப்பில் அதிக பொருட்செலவில் உருவாக்கப்பட்டு வரும் படம். தேவி ஸ்ரீ பிரசாத் இந்த படத்துக்கு இசையமைத்துள்ளார். இப்படத்தில் திஷா பதானி, பாபி தியோல், கோவை சரளா, யோகிபாபு, ரெட்டின் கிங்ஸ்லி, நடராஜன் சுப்பிரமணியன், ஜெகபதி பாபு, கே.எஸ்.ரவிகுமார் உள்ளிட்ட பலர் இணைந்து நடித்து வருகின்றனர். இந்த நிலையில் படம் வருகின்ற 14-ம் தேதி திரையரங்குகளில் வெளியாகவுள்ளது. இந்த நிலையில் படத்தின் ரிலீஸ் ட்ரெய்லர் மாலை 7 மணிக்கு வெளியாகும் என்று அறிவிக்கப்பட்டுள்ளது.