Today’s Cinema News: தளபதி 69 படத்தில் இணையும் பிரபல நடிகர் முதல் கார்த்தியின் வா வாத்தியார் பட டீசர் வரை… டாப் சினிமா செய்திகள்!

சினிமா செய்திகள்

இன்றைய சினிமா செய்திகள்: நடிகர் விஜயின் நடிப்பில் உருவாகி வரும் தளபதி 69 படத்தில் பிரபல கன்னட நடிகர் சிவராஜ்குமார் இணைவதாக வெளியான தகவல் முதல் நடிகர் கார்த்தியின் நடிப்பில் உருவாகி வரும் வா வாத்தியார் படத்தின் டீசர் வெளியானது வரை நவம்பர் மாதம் 13-ம் தேதி சினிமாவில் நடந்த முக்கிய நிகழ்வுகள் குறித்து சில.

தளபதி 69 படத்தில் கேமியோ பன்னும் பிரபல நடிகர்!

நடிகர் விஜய் தீவிர அரசியலில் ஈடுபட உள்ளதாக அறிவித்த நிலையில் அவரது கடைசி படமான தளபதி 69 படத்துடன் அவர் நடிப்பதில் இருந்து விலக உள்ளதாக தெரிவித்துள்ளார்.  இதனால் தளபதி 69 படத்தின் மீதான ரசிகர்களின் எதிர்பார்ப்பு அதிகரித்துள்ளது. இந்த நிலையில் படம் குறித்த அடுத்தடுத்த அப்டேட்டுகள் தொடர்ந்து வெளியாகி வருவது ரசிகர்களிடையே உற்சாகத்தை ஏற்படுத்தியுள்ளது. கோலிவுட்டில் கோடிக்கணக்கான ரசிகர்களோடு உச்ச நடிகராக வலம் வந்து கொண்டிருப்பவர் தான் தளபதி விஜய். இந்த நிலையில் விஜயின் இறுதிப் படத்தை இயக்குநர் எச்.வினோத் இயக்கி வருகிறார். விஜயின் 69-வது படமாக உருவாகி வரும் இந்தப் படத்தை கே.வி.என் நிறுவனம் தயாரித்து வருகிறது. இது இந்த நிறுவனம் தயாரிக்கும் முதல் தமிழ் படமாகும். இந்தப் படத்தில் விஜயுடன் இணைந்து பூஜா ஹெக்டே, கவுதம் வாசுதேவ் மேனன், பிரியாமணி, பாபி தியோல், மமிதா பைஜு,  நரேன் உள்ளிட்டோர் இணைந்துள்ளதை தயாரிப்பு நிறுவனம் அதிகாரப்பூர்வமாக அறிவித்தது. இந்த நிலையில் இந்தப் படத்தில் பிரபல கன்னட நடிகர் சிவராஜ் குமார் கேமியோ ரோலில் நடிக்க உள்ளதாக தகவல்கள் பரவி வருகின்றது. இவர் முன்னதாக ரஜினியின் ஜெயிலர் படத்திலும் தனுஷின் கேப்டன் மில்லர் படத்திலும் நடித்திருந்தது குறிப்பிடதக்கது.

பிக்பாஸில் ஃபீட்பேக் சொன்ன போட்டியாளர்கள்… கடுப்பில் வர்ஷினி

தமிழ், தெலுங்கு, மலையாளம், கன்னடம் மற்றும் இந்தி என பல்வேறு மொழிகளில் நடைபெற்று வரும் இந்த நிகழ்ச்சியில் பல முன்னணி நட்சத்திரங்கள் இதுவரை தொகுத்து வழங்கி வந்துள்ளனர். கடந்த 7 சீசன்களாக நடிகர் கமல் ஹாசன் இந்த நிகழ்ச்சியை தொகுத்து வந்த நிலையில் அவர் நிகழ்ச்சியை விட்டு விலகினார். அதன் பிறகு தற்போது விஜய் சேதுபதி இந்த 8-வது சீசனை தொகுத்து வழங்குகிறார். விஜய் டிவியின் பிக்பாஸ் நிகழ்ச்சி கடந்த 2017 ஆம் ஆண்டு முதல் ஒளிபரப்பாகி வருகிறது. கடந்த மாதம் 6-ம் தேதி பிக்பாஸ் தமிழ் 8-வது சீசன் தொடங்கியது. இதில், ரவீந்தர் சந்திரசேகர், அருண் பிரசாத், அன்ஷிதா, தீபக்,  தர்ஷிகா, தர்ஷா குப்தா, ஜாக்குலின், முத்துக்குமார்,  ஜெப்ரி, அர்னவ், ரஞ்சித், பவித்ரா ஜனனி, ஆர்.ஜே.ஆனந்தி, சாச்சனா, சத்யா,சுனிதா, செளந்தர்யா, வி.ஜே. விஷால் என 18 போட்டியாளர்கள் பிக்பாஸ் வீட்டிற்குள் அனுப்பப்பட்டனர். மேலும் 6 போட்டியாளர்கள் வைல்ட் கார்ட் என்ட்ரியாக வீட்டிற்குள் அனுப்பப்பட்டனர் கடந்த 3-ம் தேதி அன்று. அதில் ரியா தியாகராஜன், சிவகுமார், ரானவ், மஞ்சரி, ரயான், வர்ஷினி ஆகியவர்கள் பிக்பாஸ் வீட்டிற்குள் போட்டியாளர்களாக களம் இறங்கியுள்ளனர். இதனால் போட்டியின் நிலவரம் சற்று சூடு பிடித்தது. இந்த நிலையில் இன்று வெளியான வீடியோவில் மாணவர்களாக நடித்த போட்டியாளர்கள் ஆசிரியர்களாக நடித்தவர்கள் குறித்து ஃபீட்பேக் கூறுகின்றனர். இதில் போட்டியாளர்கள் பலர் பிரின்சிபலாக நடித்த வர்ஷினியின் கதாப்பாத்திரத்திற்கு பல விமர்சனத்தை தெரிவித்தனர். இதனால் வர்ஷினி கடுப்பாவது அந்த வீடியோவில் தெளிவாக தெரிகிறது. மேலும் வேறு என்ன நடக்கும் என்பது குறித்து இன்றைய எபிசோடில் தெரியவரும்.

தொடர்ந்து வசூல் சாதனை படைக்கும் ’அமரன்’ படம்!

தமிழ்த் திரைப்படங்களில் 2017ம் ஆண்டு வெளியான ரங்கூன் திரைப்படத்தின் மூலமாகத் தமிழ் சினிமாவில் இயக்குநராக அறிமுகமாகியவர் ராஜ்குமார் பெரியசாமி. இவர் இயக்கிய முதல் திரைப்படத்தின் மூலம் மக்கள் மத்தியில் பிரபலமான இவர் அடுத்து மிகப் பிரம்மாண்ட படைப்பாக உருவாக்கிய திரைப்படம் அமரன். மறைந்த முன்னாள் ராணுவ வீரர் மேஜர் முகுந்த் வரதராஜனின் வாழ்க்கை வரலாற்றை அடிப்படையாகக் கொண்டு உருவாக்கியுள்ளார். இந்த திரைப்படத்தில் நடிகர் சிவகார்த்திகேயன் மற்றும் சாய் பல்லவி இருவரும் முக்கிய கதாபாத்திரத்தில் நடித்துள்ளனர். மிகப் பிரம்மாண்ட பட்ஜெட்டில் உருவான  திரைப்படத்தை ராஜ்கமல் பிலிம்ஸ் மற்றும் சோனி பிக்ச்சர்ஸ் இணைந்து தயாரித்துள்ளது. கடந்த அக்டோபர் 31ம் தேதி தீபாவளி பண்டிகையை முன்னிட்டு வெளியாகிய இந்த திரைப்படம் 12 நாட்களில் ரூ 250 கோடிகளுக்கு மேல் வசூல் செய்து விஜய் நடிப்பில் வெளியான சர்கார் மற்றும் மெர்சல் போன்ற திரைப்படங்களை பின்னுக்குத் தள்ளி உள்ளது.

16 வயதில் நடந்த கசப்பான அனுபவம்.. பிரபல நடிகை ஓபன் டாக்!

போஜ்புரி மொழி நடிகையாக ரசிகர்கள் மத்தியில் எண்ட்ரீ கொடுத்தவர் ராஷ்மி தேசாய். இவர் 2006ஆம் ஆண்டு ஜீ தொலைக்காட்சியில் ஒளிபரப்பான ராவண் என்ற தொடரில் மண்டோதரி கேரக்டரில் நடித்ததன் மூலம் சின்னத்திரை உலகில் நடிகையாக அறிமுகமானார். தொடர்ந்து உத்தரன் என்ற இந்தி தொடரில் நடித்ததன் மூலம் பாலிவுட் ரசிகர்களிடையே மிகப்பெரிய அளவில் பிரபலமானவர் ராஷ்மி தேசாய். அந்த தொடர் மூலம் அவருக்கு ஏராளமான விருதுகளும் கிடைத்தது. இதன்பின்னர் தில் ஸே தில் தக் என்ற தொடரிலும், ஜலக் திக்லா ஜா, கத்ரோன் கே கிலாடி ஆகிய நிகழ்ச்சிகளிலும் பங்கேற்றார். ஊடகம் ஒன்றிற்கு பேட்டி அளித்துள்ள அவர்,  “திரைப்பட ஒன்றின் ஆடிஷனுக்காக அழைத்திருந்த நிலையில் நான் சென்றிருந்தேன். அப்போது எனக்கு 16 வயது தான் நடந்து கொண்டிருந்தது. ஆடிஷனுக்கு வர சொன்ன இடத்தில் ஒரே ஒரு நபர் மட்டுமே இருந்தார். எனக்கு சற்று தயக்கமாக இருந்தது. அவர் என்ன செய்தார் என்று தெரியவில்லை. சிறிது நேரத்தில் நான் சுயநினைவின்றி மயக்கம் அடையும் நிலைக்கு சென்றேன். அந்த நேரத்தில் மிகவும் அசௌகரியமாக உணர்ந்த நான் அந்த இடத்திலிருந்து எப்படியாவது தப்பிக்க வேண்டும் என நினைத்து வெளியே வந்து விட்டேன் என்று தெரிவித்துள்ளார்.

பண்ணையில் கூலி வேலை செய்யும் மோகன்லாலின் மகன் பிரணவ்

பெரும்பாலான திரைப் பிரபலங்களின் பிள்ளைகள் தங்கள் பெற்றோரின் வேலைகளை பின்பற்றும் அதே வேளையில், மலையாள சூப்பர் ஸ்டார் நடிகர் மோகன்லாலின் மகன் பிரணவ், நடிப்பதை விட விவசாய வேலையில் ஈர்க்கப்பட்டதாகத் தெரிகிறது. மனோரமா அறிக்கையின்படி, மூத்த நடிகர் மோகன்லாலின் மகன் தற்போது ஸ்பெயினில் விவசாய வேலையில் நேரத்தை செலவிடுவதாக தெரிவித்துள்ளது. மோகன்லாலின் மனைவி சுசித்ரா அளித்த பேட்டியின்படி மகன் பிரணவ் தற்போது படங்களைத் தவிர வேறு விஷயங்களில் ஆர்வமாக உள்ளதாக தெரிவித்துள்ளார். பிரணவ் தற்போது ஸ்பெயினில் உள்ள ஒரு பண்ணையில் ‘ஒர்க் அவே’ திட்டத்தில் ஈடுபட்டுள்ளதாகவும், அங்கு பணத்திற்கு பதிலாக உணவு மற்றும் தங்குமிடத்திற்கு ஈடாக வேலை செய்வதாகவும் சுசித்ரா அந்த பேட்டியில் தெரிவித்துள்ளார். காசு பணத்தை விட இதுபோன்ற அனுபவங்களை பிரணவ் விரும்புகிறார் என்றும் தற்போது குதிரைகள் மற்றும் ஆடுகளை பராமரிப்பது போன்ற பணிகளை மேற்கொண்டு வருவதாகவும் சுசித்ரா தெரிவித்துள்ளார். “பிரணவ் நான் சொல்வதை மட்டுமே கேட்கிறார் என்று உறவினர்கள் உட்பட பலர் அடிக்கடி கூறினாலும், அது அனைத்தும் உண்மை இல்லை, பிரணவிற்கு அவரது சொந்த யோசனைகள் உள்ளன. அவர் பிடிவாதமாக இல்லை, ஆனால் அவர் சரியானது என்று நம்புவதை பிரணவ் செய்கிறார் என்றும் சுசித்ரா தெரிவித்தார்.

கங்குவா படத்தின் குறைவான முன்பதிவுக்கு காரணம் என்ன?

நடிகர் சூர்யா கங்குவா மற்றும் சூர்யா 44 என இரண்டு படங்களிலும் பிசியாக வேலை செய்து வருகிறார். கிட்டதட்ட 2 ஆண்டுகளுக்கும் மேலாக இந்த படத்தின் படப்பிடிப்பு நடந்து வருகிறது. யுவி கிரியேஷன்ஸ் நிறுவனமும், ஸ்டூடியோ கிரீன் நிறுவனமும் இணைந்து பெரும் பொருட்செலவில் சூர்யாவின் கங்குவா படத்தை தயாரித்துள்ளது. இந்தப் படம் 10க்கும் மேற்பட்ட மொழிகளில் 3டி தொழில்நுட்பத்தில் படம் எடுக்கப்பட்டு வருகிறது. நடிகர் சூர்யா இந்தப் படத்தில் 13 விதமான தோற்றங்களில் நடிப்பதாக தெரிவிக்கப்பட்டிருப்பதால் படத்தின் மீது ரசிகர்களுக்கு பெரும் எதிர்பார்ப்பு நிலவுகிறது. இந்த நிலையில் படம் வருகின்ற நவம்பர் 14-ம் தேதி திரையரங்குகளில் வெளியாகும் என்று சமீபத்தில் அதிகாரப்பூர்வ அறிவிப்பு வெளியிட்டது. இந்த நிலையில் தமிழில் முன்பதிவு தொடங்கி டிக்கெட்டுகள் விற்பனையில் கலைகட்டி வரும் நிலையில் ஹிந்தியில் முன்பதிவு குறைவாக இருப்பது குறித்து தயாரிப்பாளரிடம் கேள்வி எழுப்பப்பட்டது. இதுகுறித்து பேசிய ஞானவேல் ராஜா பிவிஆர் உட்பட பல மல்டிபிளக்ஸ் திரையரங்குகளில் நாளை தான் முன்பதிவு தொடங்குவதாக அவர் தெரிவித்துள்ளார்.

Also read… படப்பிடிப்பில் சமந்தாவிற்கு நடந்த சோகம்… நடிகர் விளக்கம்!

தாயாக வேண்டும் என்ற கனவு இப்பவும் இருக்கு – நடிகை சமந்தா

நடிகர் அதர்வாவின் நடிப்பில் வெளியான பானா காத்தாடி படத்தின் மூலம் தமிழ் சினிமா ரசிகர்களின் கவனத்தை ஈர்த்தவர் நடிகை சமந்தா. அதனைத் தொடர்ந்து தெலுங்கு திரையுலகின் நேச்சுரல் ஸ்டார் நானியுடன் ‘நான் ஈ’ படத்தில் நடித்ததன் மூலம் தமிழ் சினிமாவின் கியூட் நாயகியாக வலம் வரத் தொடங்கினார் சமந்தா. அதனைத் தொடர்ந்து தமிழ் சினிமாவின் முன்னணி நடிகர்களான விஜய், சூர்யா, தனுஷ், சிவகார்த்திகேயன், விஜய் சேதுபதி உள்ளிட்டவர்களுக்கு நாயகியாக நடிக்கத் தொடங்கினார் சமந்தா. கடந்த 2022-ம் ஆண்டு தனக்கு மயோசிடிஸ் என்ற அறிய வகை நோய் இருப்பதாக சமந்தா தெரிவித்தார். அது சமந்தாவின் ரசிகர்களுக்கு பேரதிர்ச்சியாக இருந்தது. அதனை தொடர்ந்து திரைப்படங்களில் நடிப்பதில் இருந்து விலகி சிகிச்சையில் கவனம் செலுத்த தொடங்கினார். சிகிச்சையின் போதும் தொடர்ந்து சமூக வலைதளங்களில் ஆக்டிவாக இருந்து வந்தார் சமந்தா. சமீபத்தில் சமந்தா பேட்டி ஒன்றில் கலந்துகொண்டார். அதில், சமந்தா நிஜ வாழ்க்கையில் தாயாக வேண்டும் என்று தனது விருப்பத்தை வெளிப்படுத்தினார். வாழ்க்கையில் அந்த கனவுகள் மாறாமல் இருப்பதாகக் குறிப்பிட்ட அவர், தாயாக மாறுவதற்கு வயது ஒரு தடையாக இருக்கக்கூடாது என்றும் சமந்தா தெரிவித்துள்ளார்.

Also read… ஓடிடி வெளியீட்டில் தள்ளிப்போகும் ‘அமரன்’… காரணம் இதுதான்

வெளியானது ‘வா வாத்தியார்’ படத்தின் டீசர்!

நடிகர் கார்த்தியின் நடிப்பில் உருவாகியுள்ள ‘வா வாத்தியார்’ படத்தின் டீசரை தற்போது படக்குழு வெளியிட்டுள்ளது. இயக்குநர் நலன் குமாரசாமி எழுதி இயக்கியுள்ள படம் ‘வா வாத்தியார்’. இந்தப் படத்தில் கார்த்தி நாயகனாவும், கிருத்தி ஷெட்டி நாயகியாகவும் நடித்துள்ளனர். இவர்களுடன் இணைந்து ராஜ்கிரண், சத்யராஜ், ஆனந்த் ராஜ், ஜி.எம்.குமார் உள்ளிட்ட பலர் நடிக்கின்றனர். இந்தப் படத்திற்கு இசையமைப்பாளர் சந்தோஷ் நாராயணன் இசையமைத்துள்ளார். படத்தை ஸ்டூடியோ கிரீன் நிறுவனம் சார்பில் ஞானவேல் ராஜா தயாரித்துள்ளார். இந்த நிலையில் படம் வருகின்ற பொங்கலுக்கு வெளியாகும் என்று தெரிகிறது. இந்த நிலையில் படத்தின் டீசரைப் படக்குழு தற்போது வெளியிட்டுள்ளது. அதில் கார்த்தி எம்.ஜி.ஆர் ரசிகராக இருப்பது தெரிகிறது.