Today’s Cinema News: அமரன் முதல் நாள் வசூல் முதல் பவதாரணியின் இறுதிப் பாடல் வரை… டாப் சினிமா செய்திகள்!

இன்றைய சினிமா செய்திகள்: நடிகர் சிவகார்த்திகேயனின் நடிப்பில் நேற்று தீபாவளி பண்டிகையை முன்னிட்டு வெளியான ‘அமரன்’ படத்தின் முதல் நாள் வசூல் முதல் மறைந்த பாடகி பவதாரணியின் இசையில் உருவான பாடல் வெளியானது வரை நவம்பர் மாதம் 1-ம் தேதி சினிமாவில் நடந்த முக்கிய நிகழ்வுகள் குறித்து சில.

‘அமரன்’ படத்தின் முதல் நாள் வசூல் எவ்வளவு தெரியுமா?

நடிகர் சிவகார்த்திகேயன் தற்போது தனது 21-வது படத்திற்காக இயக்குநர் ராஜ்குமார் பெரியசாமியுடன் கூட்டணி வைத்தார். இந்தப் படத்திற்கு ‘அமரன்’ என்று பெயர் வைத்தனர். சோனி பிக்சர்ஸுடன் இணைந்து இந்தப் படத்தை நடிகர் கமல்ஹாசனின் ராஜ்கமல் பிலிம்ஸ் இன்டர்நேஷனல்  தயாரித்துள்ளது. இந்தப் படத்தில் சிவகார்த்திகேயன் ராணுவ வீரராக நடித்துள்ளார். அவருக்கு ஜோடியாக நடிகை சாய் பல்லவி நடித்துள்ளார்.  இசையமைப்பாளர் ஜி.வி.பிரகாஷ்குமார் இந்தப் படத்திற்கு இசை அமைத்துள்ளார். மறைந்த ராணுவ வீரர் மேஜர் முகுந்த் வரதராஜனின் வாழ்க்கையை மையமாக வைத்து இந்தப் படம் உருவாகியுள்ளது. தமிழில் மீண்டும் ஒரு தேசபக்தி படமாக உருவாகியுள்ள இந்தப் படத்தின் மீதான ரசிகர்களின் எதிர்பார்ப்பு அதிகரித்திருந்தது. இந்த நிலையில் படம் நேற்று தீபாவளி பண்டிகையை முன்னிட்டு திரையரங்குகளில் வெளியாகியுள்ளது. இதனைத் தொடர்ந்து படத்தின் முதல் நாள் வசூல் குறித்த தகவல்கள் வெளியாகியுள்ளது. உலகம் முழுவதும் இந்தப் படம் ரூ. 21 கோடிகள் வசூலித்துள்ளதாகவும் தமிழ்நாட்டில் மட்டும் 15 கோடிகள் வசூலித்துள்ளதாக கோலிவுட் வட்டாரங்களில் தகவல்கள் பரவி வருகின்றது.

பிக்பாஸ் வீட்டில் நடந்த பட்டாசு டாஸ்க்…

பிக்பாஸ் தமிழ் சீசன் 8-ன் 26-வது நாளிற்கான முதல் ப்ரோமோ வீடியோவை நிகழ்ச்சி குழு வெளியிட்டுள்ளது. கடந்த 6-ம் தேதி பிக்பாஸ் தமிழ் 8-வது சீசன் தொடங்கியது. இதில், ரவீந்தர் சந்திரசேகர், அருண் பிரசாத், அன்ஷிதா, தீபக்,  தர்ஷிகா, தர்ஷா குப்தா, ஜாக்குலின், முத்துக்குமார்,  ஜெப்ரி, அர்னவ், ரஞ்சித், பவித்ரா ஜனனி, ஆர்.ஜே.ஆனந்தி, சாச்சனா, சத்யா,சுனிதா, செளந்தர்யா, வி.ஜே. விஷால் என 18 போட்டியாளர்கள் பிக்பாஸ் வீட்டிற்குள் அனுப்பப்பட்டனர். முத்துகுமரன் இந்த வார பிக்பாஸ் வீட்டின் கேப்டன் ஆனார். அதனை தொடர்ந்து நடைப்பெற்ற இந்த வாரத்திற்கான நாமினேஷனில் ஜாக்குலின், சுனிதா, அன்சிதா, பவித்ரா, தீபக், ரஞ்சித், ஜெஃப்ரி, அருண், சத்யா ஆகியோர் நாமினேட் ஆகியுள்ளனர். தொடர்ந்து ஆண்கள் அணியில் இருந்து விஷால் பெண்கள் அணிக்கும், பெண்கள் அணியில் இருந்து சௌந்தர்யா ஆண்கள் அணிக்கும் இந்த வாரம் ஸ்வாப் ஆகியுள்ளனர். இந்த நிலையில் இன்று பிக்பாஸ் வீட்டில் 26-வது நாளிற்கான முதல் ப்ரோமோ வீடியோவை நிகழ்ச்சிக்குழு வெளியிட்டது. இன்று பிக்பாஸ் வீட்டில் டமால் டுமீல் பட்டாசு டாஸ்க் வழங்கப்பட்டுள்ளது. அதில் படபட என்று வெடிக்கும் பட்டாசு யார் என்றும் நமுத்துபோன பட்டாசு யார் என்றும் மாறி மாறி போட்டியாளர்கள் கூறுகின்றனர். இதனால் இன்றும் ஒரு பிரச்னை பிக்பாஸ் வீட்டிற்குள் வெடிக்கும் என்று எதிர்பார்க்கப்படுகிறது.

இன்று நடிகை ஐஸ்வர்யா ராயின் 51-வது பிறந்த நாள்!

கர்நாடகா மாநிலத்தின் மங்களூரில் துளு பேசும் இந்து குடும்பத்தில் 1973-ம் ஆண்டு நவம்பர் 1-ம் தேதி பிறந்தவர் நடிகை ஐஸ்வர்யா ராய். 1991-ம் ஆண்டு ஐஸ்வர்யா ராய், சர்வதேச சூப்பர் மாடல் விருது வென்றார். 1993-ம் ஆண்டு அமீர்கான் மற்றும் மஹிமா சவுத்ரியுடன் பெப்சி விளம்பரத்தில் நடித்து பிரபலமானார். 1994-ம் ஆண்டு உலக அழகி பட்டம் வென்று மொத்த உலகத்தையே இந்தியாவை நோக்கி திரும்பி பார்க்க வைத்தார். அப்போது உலகின் அமைதியே தனது கனவு என்று பேசினார். அது மக்களிடையே பெரும் வரவேற்பைப் பெற்றது. கடந்த 1997-ம் ஆண்டு இயக்குநர் மணிரத்னம் இயக்கத்தில் உருவான இருவர் என்ற படத்தின் மூலம் திரையுலகில் நடிகையாக அறிமுகமானார் ஐஸ்வர்யா ராய். 1998-ம் ஆண்டு இயக்குனர் ஷங்கர் இயக்கத்தில் பிரஷாந்த் மற்றும் நாசர் இரட்டை கதாபாத்திரங்கள் நடித்துள்ள திரைப்படம். இதில் மதுமிதா கதாபாத்திரத்தில் நடிகை ஐஸ்வர்யா ராய் நடித்துள்ளார். இப்படம் தமிழ் சினிமாவில் பலரால் கொண்டாடப்பட்ட வெற்றி திரைப்படமாகும். இதனைத் தொடர்ந்து நடிகை ஐஸ்வர்யா ராய் நடிப்பில் தமிழில் வெளியான கண்டுகொண்டேன் கண்டுகொண்டேன், எந்திரன், ராவணன், பொன்னியின் செல்வன் பாகம் 1, பொன்னியின் செல்வன் பாகம் 2 என தமிழில் நடித்தது குறைவான படங்கள் என்றாலும் அந்த அனைத்துமே சூப்பர் டூப்பர் ஹிட் அடித்தது. இந்த நிலையில் இன்று நடிகை ஐஸ்வர்யா ராய் பச்சன் தனது 51-வது பிறந்த நாளை கொண்டாடுகிறார். அவருக்கு பிரபலங்கள் மற்றும் ரசிகர்கள் உட்பட பலரும் தங்களது வாழ்த்துகளை தெரிவித்து வருகின்றனர்.

ஆர்.ஜே.பாலாஜியின் புது படத்தின் டைட்டில் டீசர் இதோ!

நடிகர் ஆர்.ஜே. பாலாஜி அடுத்ததாக நடிக்க உள்ள புதிய படத்தின் டைட்டில் டீசர் வெளியாகி இணையத்தில் வைரலாகி வருகின்றது. தமிழ் சினிமாவில் அறிமுகம் ஆவதற்கு முன்னர் மக்கள் மத்தியில் நன்கு பிரபலம் அடைந்தவர் ஆர்.ஜே. பாலாஜி. தனது வானொலி நிகழ்ச்சிகள் மூலம் நல்ல வரவேற்பை மக்கள் மத்தியில் பெற்றவர் ஆர்.ஜே.பாலாஜி. தமிழ் சினிமாவிற்குள் நடிகராக காலடி எடுத்து வைத்து, தான் நடித்த படங்களில் கவனம் ஈர்த்தார். நடிப்பது மட்டும் இல்லாமல், எல்.கே.ஜி., மூக்குத்தி அம்மன் போன்ற படங்களை இயக்கி இயக்குநராகவும் வலம் வருகிறார். இவர் அடுத்ததாக நடிகர் சூர்யாவின் 45-வது படத்தை இயக்கவுள்ளர். தற்போது சொர்க்க வாசல் படத்தில் நடித்து வரும் இவர் அடுத்ததாக நடிக்க உள்ள படத்தின் டைட்டில் டீசர் தற்போது வெளியாகியுள்ளது. அதன்படி இந்தப் படத்திற்கு ‘ஹேப்பி எண்டிங்’ என்று பெயர் வைக்கப்பட்டுள்ளது.

’வேட்டையன்’ படத்திலிருந்து வெளியானது ‘ஹண்டர் வண்டார்’ வீடியோ பாடல்

நடிகர் ரஜினியின் வேட்டையன் படத்தின் ‘ஹண்டர் வண்டார்’ வீடியோ பாடலைப் படக்குழு வெளியிட்டுள்ளது. ஜெய் பீம் படத்தின் இயக்குநர் த.செ.ஞானவேல் இயக்கும் அந்தப் படத்தின் மீது உச்சக்கட்ட எதிர்பார்ப்பு ரசிகர்களிடம் இருக்கிறது. வேட்டையன் திரைப்படம், கடந்த மாதம் அக்டோபர் 10ஆம் தேதி திரையரங்குகளில் வெளியானது. இந்தப் படத்தில் அமிதாப்பச்சன், ஃபஹத் ஃபாசில், ராணா, மஞ்சு வாரியர், துஷாரா விஜயன், ரித்திகா சிங் உட்பட பலர் நடித்துள்ளனர். அனிருத் இசை அமைத்துள்ள இந்தப் படத்தை லைகா நிறுவனம் தயாரித்துள்ளது. ஆக்‌ஷன் த்ரில்லர் பாணியில் இந்தப் படம் வெளியானது. ‘ஹண்டர் வண்டார்’ என்ற இந்தப் பாடலை அறிவு எழுதியுள்ளார். சித்தார்த் பஸ்ரூர் இந்தப் பாடலைப் பாடியுள்ளார். பாடல் ரசிகர்களிடையே கவனம் பெற்று வருகின்றது.

‘ஹே கருகருவா’ பவதாரணியின் கடைசிப் பாடல் இதோ!

இசையமைப்பாளர் இளையராஜாவின் மகளும் இசையமைப்பாளர் யுவன் சங்கர் ராஜாவின் அக்காவுமான பவதாரணி இறுதியாக இசையமைத்த பாடல் தற்போது வெளியாகியுள்ளது. பாடகியான பவதாரணி புற்று நோயால் அவதிப்பட்டு வந்த நிலையில் கடந்த ஜனவரி மாதம் சிகிச்சைப் பலனின்றி உயிரிழந்தார். இந்த நிலையில் இவரது குரல் விஜயின் கோட் படத்தில் ஏஐ மூலம் பயன்படுத்தப்பட்டது. இந்தப் பாத்திற்கு இவரது தம்பி யுவன் சங்கர் ராஜா இசையமைத்திருந்தார். இதனைத் தொடர்ந்து பவதாரணி இறுதியாக இசையமைத்த படத்தின் பாடல் தற்போது வெளியாகியுள்ளது. ’புயலில் ஒரு தோணி’ என்ற இந்தப் படத்தை இயக்குநர் ஈசன் இசையமைத்துள்ளார். இந்தப் படத்தில் புதுமுக நடிகரக்ள் விஷ்ணுபிரகாஷ் மற்றும் அர்ச்சனாசிங் ஆகியோர் நடித்துள்ளனர். இந்தப் படத்தில் மொத்தம் இரண்டு பாடல்கள் உள்ளது. இதில் ‘ஹே கருகருவா’ என்று தொடங்கும் பாடல் வெளியாகியுள்ளது. இந்தப் பாடலை கவிஞர் சிநேகன் எழுதியுள்ளார். இசையமைப்பாளர் ஜி.வி.பிரகாஷ் மற்றும் பாடகி எம்.எம்.மானசி ஆகியோர் இணைந்து பாடியுள்ளனர்.

டொவினோ தாமஸின் ஏஆர்எம் படத்தில் ஓடிடி ரிலீஸ் எப்போது?

நடிகர் டொவினோ தாமஸின் நடிப்பில் வெளியாகி சூப்பர் ஹிட் அடித்த ‘ஏஆர்எம்’ படத்தின் ஓடிடி ரிலீஸ் குறித்த அப்டேட்டை படக்குழு வெளியிட்டுள்ளது. ஒவ்வொரு படத்திலும் தனது நடிப்பில் வித்தியாசத்தை காட்டும் நடிகர் டொவினோ தாமஸ் நடிப்பில் முன்னதாக வெளியான ‘மின்னல் முரளி’ படம் சூப்பர் ஹிட் அடித்தது. தற்போது டொவினோ தாமஸ் நடிப்பில் பெரிதும் எதிர்பார்க்கப்பட்ட படம் ‘அஜயந்தே ரண்டாம் மோஷனம்’. பீரியட் டிராமாவாக உருவான இப்படத்தை அறிமுக இயக்குநர் ஜிதின் லால் இயக்கியுள்ளார். இந்தப் படத்தில் கிருத்தி ஷெட்டி, பாசில் ஜோசப், ஐஸ்வர்யா ராஜேஷ், சுரபி லட்சுமி, சிவாஜித் மற்றும் அஜு வர்கீஸ் உள்ளிட்ட பலர் நடித்துள்ளனர். திபு நினன் தாமஸ் இசையமைத்துள்ளார். இந்தப் படம் முன்னதாக திரையரங்குகளில் வெளியாகி ரசிகரக்ளிடையே நல்ல வரவேற்பைப் பெற்றது. இந்த நிலையில் படம் வருகின்ற 8-ம் தேதி ஹாட்ஸ்டார் ஓடிடியில் வெளியாகவுள்ளதை படக்குழு அறிவித்துள்ளது.