Today’s Cinema News: கண்கலங்கிய ரஜினி.. பிசாசு-2 படத்துக்கு தடை.. இன்றைய சினிமா செய்திகள்!

கோப்பு புகைப்படம்

இன்றைய சினிமா செய்திகள்: மக்களின் மிகப்பெரிய பொழுதுபோக்கு சாதனமாக கலைத்துறை திகழ்கிறது. இது சின்னத்திரை, பெரிய திரை என பிரிவுகளாக இயங்கி வருகிறது. இரு தரப்பிலும் சரிசமமான ரசிகர்களும் உள்ளனர். ஒவ்வொரு நாளும் திரைத்துறைச் சார்ந்து ஏராளமான நிகழ்வுகள் நடைபெறுகிறது. ஆனால் அவற்றை எல்லாம் எல்லா நேரங்களிலும் நம்மால் தெரிந்துக் கொள்ள முடியவில்லை. அப்படி நீங்கள் தவறவிட்ட இன்றைய சினிமாவில் நடைபெற்ற முக்கிய நிகழ்வுகளை நாம் காணலாம்.

• கண்டிப்பா எல்லாரும் தியேட்டரில் மிஸ் பண்ணாம பாருங்க – அமரன் படத்தைப் புகழ்ந்த ரஜினிகாந்த்

ராஜ்குமார் பெரியசாமி இயக்கத்தில் சிவகார்த்திகேயன், சாய் பல்லவி, ராகுல் போஸ் உள்ளிட்ட பலரும் நடித்த அமரன் படம் கடந்த அக்டோபர் 31ம் தேதி தீபாவளி வெளியீடாக திரைக்கு வந்தது. இந்தப் படத்தைப் பார்த்த நடிகர் ரஜினிகாந்த் சிவகார்த்திகேயன் மற்றும் இயக்குனர் ராஜ்குமார் பெரியசாமியை நேரில் அழைத்து பாராட்டினார். அது மட்டுமல்லாமல் படத்தின் கிளைமாக்ஸ் காட்சியை பார்த்துவிட்டு தன்னால் அழுகையை கட்டுப்படுத்த முடியவில்லை என தெரிவித்த அவர் கண்டிப்பாக இந்த படத்தை தியேட்டரில் மிஸ் பண்ணாமல் பாருங்கள் என அனைவரையும் கேட்டுக் கொண்டுள்ளார்.

• மிஷ்கினின் பிசாசு – 2 படத்துக்கு இடைக்கால தடை – ரசிகர்கள் அதிர்ச்சி

தமிழ் சினிமாவின் முன்னணி இயக்குனரான மிஷ்கின் இயக்கத்தில் உருவாகியுள்ள பிசாசு படத்தின் 2ஆம் பாகத்தை வெளியிட சென்னை உயர்நீதிமன்றம் இடைக்கால தடை விதித்துள்ளது. ஆண்ட்ரியா முதன்மை கதாபாத்திரத்தில் நடித்துள்ள இப்படத்திற்கு கார்த்திக் ராஜா இசையமைத்துள்ளார். இதனிடையே இரண்டாம் குத்து படத்துக்கான விநியோக உரிமை தொடர்பான கடன் பாக்கியை வழங்கும் வரை பிசாசு 2 படத்தை வெளியிடக்கூடாது என தயாரிப்பு நிறுவனம் மீது மற்றொரு நிறுவனம் தொடர்ந்த வழக்கில் இந்த உத்தரவிடப்பட்டுள்ளது. இதனால் ரசிகர்கள் அதிர்ச்சியடைந்துள்ளனர்.

• துவா படுகோன் சிங் பெயருக்கு இப்படி ஒரு அர்த்தமா?

நடிகர் ரன்வீர் சிங்- நடிகை தீபிகா படுகோன் தம்பதியினர் தங்கள் குழந்தைக்கு துவா படுகோனே சிங் என பெயரிட்டுள்ளனர். தீபாவளியை முன்னிட்டு தங்களது பெண் குழந்தையின் புகைப்படத்தை முதன் முதலாக இன்ஸ்டாகிராம் பக்கத்தில் அவர்கள் பதிவிட்டிருந்தனர். இந்த புகைப்படம் இணையத்தில் வைரலான நிலையில் துவா என்றால் பிரார்த்தனை என்று அர்த்தம் என்றும், எங்கள் பிரார்த்தனைக்கான பதில் அவள் என்றும் பெயருக்கு விளக்கம் அளித்துள்ளனர்.

• அதர்வா நடித்துள்ள அடுத்த படத்தின் ரிலீஸ் தேதி அறிவிப்பு!

துருவங்கள் பதினாறு, மாஃபியா பாகம் 1 ஆகிய படங்களை இயக்கிய கார்த்திக் நரேன் இயக்கத்தில் அடுத்ததாக உருவாகியுள்ள படம் நிறங்கள் மூன்று. இந்த படத்தில் அதர்வா, அம்மு அபிராமி, சரத்குமார், ரகுமான் உள்ளிட்ட பலரும் நடித்துள்ளனர். இந்த படம் வரும் நவம்பர் 22ஆம் தேதி உலகமெங்கும் வெளியாகும் என அதிகாரப்பூர்வமாக அறிவிக்கப்பட்டுள்ளது. இப்படத்தை ஐங்கரன் இண்டர்நேஷனல் நிறுவனம் தயாரித்துள்ளது.

• துல்கர் சல்மான் படத்திற்கு எகிறும் எதிர்பார்ப்பு – அதிகரிக்கும் வசூல்

நடிகர் துல்கர் சல்மான் நடித்துள்ள லக்கி பாஸ்கர் படத்தின் இரண்டாம் நாள் வசூல் என்ன என்பதை படக்குழு அதிகாரப்பூர்வமாக அறிவித்துள்ளது. அதன்படி இப்படம் இரண்டாம் நாளில் ரூபாய் 26.2 கோடி வசூல் செய்துள்ளதாக தெரிவிக்கப்பட்டுள்ளது. வெங்கி அட்லூரி இயக்கியுள்ள இப்படத்தில் மீனாட்சி சவுத்ரி, ராம்கி உள்ளிட்ட பலர் நடித்துள்ளனர். ஜிவி பிரகாஷ் குமார் இசையமைத்துள்ளார்.

• தனுஷ், நாகார்ஜூனா நடிப்பில் உருவாகியுள்ள குபேரா படத்தின் டீசர் ரிலீஸ்

சேகர் கமுலா இயக்கத்தில் தனுஷ், நாகர்ஜுனா, ராஷ்மிகா மந்தனா உள்ளிடோர் நடிப்பில் உருவாகியுள்ள ‘குபேரா’ படத்தின் டீசர் வரும் 15ம் தேதி வெளியாகும் என படக்குழு அறிவித்துள்ள நிலையில் ரசிகர்கள் மகிழ்ச்சியடைந்துள்ளனர். இந்த படத்தில் தனுஷ் வித்தியாசமான கெட்டப்பில் நடித்து வருகிறார்.

• அதிர்ஷ்டசாலி படத்தின் ஃபர்ஸ்ட் லுக் போஸ்டர் நாளை ரிலீஸ்

திருச்சிற்றம்பலம் படத்தை தொடர்ந்து இயக்குனர் மித்ரன் ஆர் ஜவகர் இயக்கத்தில் உருவாகியுள்ள அதிர்ஷ்டசாலி படத்தின் பர்ஸ்ட் லுக் போஸ்டர் நாளை வெளியாகும் என படக் குழு அறிவித்துள்ளது. மாதவன் மடானா செபாஸ்டியன் நடித்துள்ள இந்த படத்திற்கு யுவன் சங்கர் ராஜா இசையமைத்துள்ளார்.