Today’s Cinema News: விபத்தில் சிக்கிய ஜீவா… ஜெயம் ரவி மனைவி வேதனை… டாப் சினிமா செய்திகள்!

இன்றைய சினிமா செய்திகள்: நடிகர் ஜீவா குடும்பத்துடன் காரில் சென்று கொண்டிருந்த போது ஏற்பட்ட விபத்து, நடிகர் ஜெயம் ரவியின் மனைவி விவாகரத்து முடிவு குறித்து தனக்கு எதுவும் தெரியாது என வெளியிட்ட அறிக்கை என இன்று செப்டம்பர் மாதம் 11-ம் தேதி சினிமாவில் நடந்த முக்கிய நிகழ்வுகள் குறித்து சில.

அறுவை சிகிச்சை குறித்து டிடி-யின் உருக்கமான பதிவு!

பிரபல தொகுப்பாளினி டிடி தனக்கு நடந்த மூட்டு அறுவை சிகிச்சை குறித்து வெளியிட்ட பதிவு இணையத்தில் வைரலாகி வருகின்றது. விஜய் தொலைக்காட்சியில் எத்தனையோ தொகுப்பாளினிகள் இருந்தாலும் அன்றும் இன்றும் என்றும் ரசிகர்கள் அனைவருக்கும் பிடித்த தொகுப்பாளினி டிடி என்கிற திவ்யதர்ஷினி தான். பள்ளி படிக்கும் போது தனது குடும்ப சூழ்நிலை காரணமாக இந்த வேலைக்கு வந்த டிடி-க்கு சினிமா ரசிகைகளுக்கு இருக்கும் அளவுக்கு ரசிகர்கள் அதிகம். கடந்த சில வருடங்களாக தனது மூட்டு பிரச்னை காரணமாக பெரிய அளவில் தொலைக்காட்சி நிகழ்சிகளை தொகுத்து வழங்காமல் இருந்தார். இந்நிலையில் கடந்த இரண்டு மாதங்களுக்கு முன்னதாக தனக்கு நடந்த மூட்டு மாற்று அறுவை சிகிச்சை குறித்து அவர் வெளியிட்டுள்ள பதிவு ரசிகர்களை சோகத்தில் ஆழ்த்தியுள்ளது. மேலும் அவர் விரைவில் குணமடைய வேண்டும் என்று ரசிகர்கள் பதிவிட்டு வருகின்றனர்.

விவாகரத்து குறித்து ஜெயம் ரவி மீது ஆர்த்தி குற்றச்சாட்டு

ஜெயம் ரவி கடந்த 9-ம் தேதி தனது மனைவியை பிரிவதாக வெளியிட்ட செய்தியை பார்த்து அதிர்ச்சி அடைந்ததாகவும், இதுகுறித்து தன்னிடம் எதுவும் பேசவில்லை என்று அவரது மனைவி ஆர்த்தி தற்போது அறிக்கை ஒன்றை வெளியிட்டுள்ளார். இது என் கவனத்துக்கு வராமலும் என் ஒப்புதல் இல்லாமலும் எடுக்கப்பட்ட முடிவு என ஆர்த்தி தெரிவித்துள்ளார். இது முழுக்க முழுக்க என் கவனத்திற்கு வராமலும், என் ஒப்புதல் இல்லாமலும் வெளியான ஒன்று என்பதை தெளிவுபடுத்த விரும்புகிறேன். பரஸ்பர நம்பிக்கை மற்றும் மரியாதையுடன் கடந்த 18 வருடங்களாக நான் வாழ்ந்த வாழ்க்கை இந்த அறிக்கையின் மூலம் அதற்குரிய கௌரவம், கண்ணியம் மற்றும் தனித்தன்மையை இழந்து விட்டதாக நான் உணர்கிறேன் என்று ஆர்த்தி அந்த அறிக்கையில் தெரிவித்துள்ளார்.

நாயகி ஸ்ரேயா சரண் பிறந்த நாள் இன்று…!

ரசிகர்களால் மெல்லிடை நாயகி என்று கொண்டாடப்படும் நடிகை ஸ்ரேயா சரண் இன்று தனது 42-வது பிறந்த நாளை கொண்டாடி வருகின்றார். அவருக்கு பிரபலங்கள், ரசிகரகள் தங்களது வாழ்த்துகளை தெரிவித்து வருகின்றனர். ஹரித்வாரில் பிறந்த வளர்ந்த நடிகை ஸ்ரேயா சரண் ஒரு தேர்ந்த கதக் மற்றும் ராஜஸ்தானி நடன கலைஞர். அந்த வகையில் அவர் பல நடன நிகழ்ச்சிகளில் பங்கேற்றுள்ளார். அப்படி ஒரு நடன நிகழ்ச்சியில் கலந்து கொண்ட போது தான் அவருக்கு ராமோஜி பிலிம்ஸ் தனது இஷ்டம் திரைப்படத்தில் நடிக்க ஸ்ரேயாவுக்கு அழைப்பு விடுத்துள்ளது. தெலுங்கில் வெளியான இஸ்டம் என்ற திரைப்படத்தின் மூலம் முதன் முறையாக திரைத்துறைக்கு அறிமுகப்படுத்தப்பட்ட இவர் தமிழில் “எனக்கு 20 உனக்கு 18” என்ற திரைப்படத்தில் சிறப்புத் தோற்றத்தில் தோன்றி தமிழ் ரசிகர்கள் அனைவரையும் ரசிக்க வைத்திருப்பார்.

வசூல் வேட்டையில் விஜயின் ‘கோட்’…

நடிகர் விஜயின் நடிப்பில் கடந்த 5-ம் தேதி உலகம் முழுவதும் வெளியான ‘தி கிரேட்டஸ்ட் ஆஃப் ஆல் டைம்’ படத்தின் வசூல் குறித்து படத்தின் இயக்குநர் வெங்கட் பிரபு வெளியிட்டுள்ள இன்ஸ்டா பதிவு இணையத்தில் வைரலாகி வருகின்றது. விஜய் இந்தப் படத்தில் அப்பா, மகன் என இரண்டு கதாப்பாத்திரங்களில் நடித்துள்ளார். தீவிர அரசியலில் களம் இறங்க உள்ள விஜய் இனி படங்களில் நடிக்க மாட்டேன் என்று அறிவித்திருந்ததால் இந்த படம் இந்த ஆண்டின் மிகவும் எதிர்பார்க்கப்பட்ட படங்களில் ஒன்றாக இருந்தது குறிப்பிடத்தக்கது. பெரும் எதிர்பார்ப்புக்கு மத்தியில் விஜய் நடித்துள்ள தி கோட் திரையரங்குகளில் வெளியாகி வசூலில் சக்கைப் போடு போட்டு வருகிறது. படம் வெளியாகி ஒரு வாரம் முடிந்த நிலையில் வசூல் நிலவரம் குறித்த தகவல் இணையத்தில் தீயாய் பரவி வருகின்றது. முதல் நாளில் ரூ. 126 கோடியுடன் தொடங்கிய வசூல் வேட்டை தாறுமாறாக நடந்து வருகிறது. கடந்த செப்டம்பர் 5ம் தேதி வெளியான இப்படம் 6 நாள் முடிவில் உலகம் முழுவதும் ரூ. 312 கோடி வரை வசூல் வேட்டை நடத்தியுள்ளது என தகவல்கள் வெளியாகியுள்ளது.

கார் விபத்தில் சிக்கிய நடிகர் ஜீவா…

நடிகர் ஜீவா தனது குடும்பத்தினருடன் சின்ன சேலம் அருகே சென்று கொண்டிருந்தபோது அவருடைய கார் விபத்துக்குள்ளான செய்தி ரசிகர்களிடையே சோகத்தை ஏற்படுத்தியுள்ளது. தமிழ் சினிமாவில் முன்னணி நடிகராக இருக்கும் ஜீவா இன்று தன்னுடைய மனைவி மற்றும் குடும்பத்தோடு சேலத்தில் இருந்து சென்னைக்கு காரில் சென்று கொண்டிருந்தார். அவர்கள் சென்ற கார் கள்ளக்குறிச்சி அருகே சென்று கொண்டிருந்தபோது திடீரென குறுக்கே ஒருவர் வந்துள்ளார். அப்போது நிலை தடுமாறிய ஜீவா அந்த நபரின் மீது மோதாமல் இருக்க காரை திருப்பியுள்ளார். அப்போது அங்கு இருந்த பேரிகார்ட் மீது காட் மோதி விபத்து ஏற்பட்டுள்ளது. இந்த விபத்தில் நல்வாய்ப்பாக யாருக்கும் பெரிய காயங்கள் எதுவும் ஏற்படவில்லை என்று தெரிவிக்கப்படுகிறது.

’கடைசி உலகப் போர்’ ட்ரெய்லர் வெளியானது!

நடிகர் ஹிப் ஹாப் ஆதி நடிப்பில் உருவாகியுள்ள ’கடைசி உலகப் போர்’ படத்தின் ட்ரெய்லரைப் படக்குழு வெளியிட்டுள்ளது. இசையமைப்பாளர், நடிகர், தயாரிப்பாளர், இயக்குனர், பாடகர் என பன்முக திறமையுடன் கோலிவுட்டில் வலம் வந்து கொண்டிருப்பவர்களில் ஹிப் ஹாப் தமிழா ஆதியும் ஒருவர். இசையமைப்பாளராக ஆம்பள உள்ளிட்ட பல படங்களில் தோன்றி மிகப்பெரிய ஹிட் கொடுத்த இவர் தமிழ் சினிமாவில் மீசைய முறுக்கு என்கின்ற திரைப்படத்தின் மூலம் இயக்குனராகவும், கதையின் நாயகனாகவும் அறிமுகமானார். அதற்கு முன்னதாகவே பல திரைப்படங்களில் இசையமைப்பாளராக பணியாற்றியுள்ளார். அடுத்து 2021-ல் ‘சிவகுமாரின் சபதம்’ என்ற தனது இரண்டாவது படத்தை இயக்கினார். தற்போது அவர் மூன்றாவது படத்தை இயக்கியுள்ளார். இந்தப் படத்துக்கு ‘கடைசி உலகப் போர்’ என தலைப்பிடப்பட்டுள்ளது. இந்தப் படத்தின் ட்ரெய்லர் தற்போது வெளியாகி ரசிகர்களிடையே கவனம் பெற்று வருகின்றது.

விஜய் படத்தில் நடிக்க மறுத்த சினேகா!

செல்வபாரதி இயக்கத்தில் 2003ம் ஆண்டு விஜய் மற்றும் சினேகா ஜோடியாக நடித்து வெளிவந்து ரசிகர்கள் மத்தியில் நல்ல வரவேற்பை பெற்ற படம் வசீகரா. காதல், காமெடி, குடும்பம் என அனைத்தும் கலந்த கலவையாக படம் அமைந்தது. அதன்பின், இவர்கள் இருவரும் இணைந்து நடிக்கவே இல்லை. சமீபத்தில் விஜய் மனைவியாக சினேகா GOAT படத்தில் நடித்திருப்பார். இந்த ஜோடியை மீண்டும் திரையில் ஒன்றாக நடிப்பதை பார்த்து ரசிகர்கள் பெரிதும் கொண்டாடினர். சினேகா விஜய்க்கு அண்ணியாக நடிக்கும் வாய்ப்பை மறுத்தது ஏன் என்பதை குறித்து சமீபத்தில் நடைபெற்ற விருது விழா நிகழ்ச்சியில் கூறியுள்ளார். அதில், விஜய்யுடன் ஜோடியாக நடித்து விட்டு திடீரென அவருக்கு அண்ணியாக நடிக்க வேண்டும் என்று சொன்ன போது எனக்கு அது சரியாக படவில்லை. அதனால் தான் அந்த படத்தை நிராகரித்து விட்டேன் என்று கூறியுள்ளார்.

நடிகை மலைகா அரோராவின் தந்தை தற்கொலை

பாலிவுட்டில் முன்னணி நடிகையாக வலம் வருபவர் மலைக்கா அரோரா. இவர், மணிரத்னம் இயக்கத்தில் வெளியான ‘உயிரே’ படத்தில் இடம்பெறும் “தையா தையா” என்ற பாடலில் ரெயிலின் மீது ஷாருக்கானுடன் நடனம் ஆடியதன் மூலம் பிரபலமானவர் ஆவார். இவர் நடன நிகழ்ச்சிகளையும், ரியாலிட்டி நிகழ்ச்சிகளையும் தொகுத்து வழங்கி வருகிறார். நடிகை மலைகா அரோராவின் தந்தையான அனில் அரோரா (65), இன்று காலை 9 மணியளவில் தற்கொலை செய்து கொண்டார். மும்பையில் உள்ள பாந்த்ரா பகுதியில் தான் தங்கியிருக்கும் அடுக்குமாடி குடியிருப்பில் உள்ள 6-வது மாடியில் இருந்து குதித்து தற்கொலை செய்து கொண்டார். அவர் சம்பவ இடத்திலேயே பரிதாபமாக உயிரிழந்து விட்டார்.

அர்ஜுன் தாஸ், அதிதி சங்கர் படத்தின் படப்பிடிப்பு நிறைவு!

தமிழில் மாஸ்டர், கைதி, விக்ரம் உள்ளிட்ட படங்களில் நடித்ததன் மூலம் ரசிகர்கள் மத்தியில் பிரபலமான அர்ஜுன் தாஸ், அநீதி, ரசவாதி போன்ற பல படங்களில் கதாநாயகனாக நடித்தார். தற்போது அர்ஜுன் தாஸ் நடிப்பில் புதிய திரைப்படம் ஒன்று உருவாகி இருக்கிறது. இந்த படத்தில் அர்ஜுன் தாஸுக்கு ஜோடியாக இயக்குனர் ஷங்கரின் இளைய மகள் அதிதி ஷங்கர் நடித்துள்ளார். அறிமுக இயக்குனர் விக்னேஷ் ஸ்ரீகாந்த் இயக்கத்தில் உருவாகும் இந்த திரைப்படத்திற்கு ‘புரொடக்சன் நம்பர் 4’ என தற்காலிகமாக பெயரிடப்பட்டுள்ளது. இந்நிலையில், இப்படத்தின் படப்பிடிப்பு நிறைவடைந்துள்ளதாக தயாரிப்பு நிறுவனம் புகைப்படம் வெளியிட்டு தெரிவித்துள்ளது. தற்போது இந்த புகைப்படங்கள் இணையத்தில் வைரலாகி வருகின்றன.