எடப்பாடி எங்களுக்கு துரோகம் செய்துவிட்டார் – அன்புமணி காட்டம்

தேசிய ஜனநாயக கூட்டணியின் தென்சென்னை நாடாளுமன்ற தொகுதி பாஜ வேட்பாளர் தமிழிசை சவுந்தர்ராஜனை ஆதரித்து பாமக தலைவர் அன்புமணி இன்று பிரசாரத்தை தொடங்கினார். இதற்காக இன்று மாலை சோழிங்கநல்லூரில் நடந்த பிரசார மேடைக்கு வந்த அன்புமணி, வேட்பாளர் வருகைக்காக காத்திருந்தார். அப்போது பாமக தொண்டர்கள் குறைவாக காணப்பட்டனர். மேலும் கூட்டணி கட்சித் தொண்டர்களும் இல்லாததைக் கண்டு முகம் சுளித்தபடி அவர் மேடையில் அமர்ந்திருந்தார். வேட்பாளர் தமிழிசை சவுந்தர்ராஜன் 15 நிமிட தாமதத்திற்குப் பிறகு வந்தார்.

அப்போது, அன்புமணி பேசுகையில், அதிமுக எதை வைத்து பிரசாரம் செய்வார்கள்? அவர்களுக்கு பிரதமர் வேட்பாளர் இருக்கிறாரா? இல்லை, தேசிய கட்சி இருக்கிறதா? அதிமுகவுக்கு வாக்களித்தால் அவர்கள் எங்கு செல்வார்கள்? இங்கும் அவர்கள் ஆளுங்கட்சி கிடையாது, அங்கும் ஆளுங்கட்சி கிடையாது. எனவே அதிமுகவிற்கு ஓட்டு போட்டு உங்கள் வாக்குகளை வீணாக்காதீர்கள்.

தேர்தல் நேரத்தில் மட்டும் உங்களை வந்து சந்திப்பார்கள். தேர்தல் முடிந்தவுடன் சென்று விடுவார்கள். சின்னத்திற்காக வாக்களிக்காதீர்கள், சமூக கொள்கைக்காக வாக்களியுங்கள். எங்களுக்கு துரோகம் செய்துவிட்டார்கள் என்று எடப்பாடி சொல்கிறார். நாங்கள் என்ன துரோகம் செய்தோம்? 2019ம் ஆண்டு நாங்கள் கூட்டணியில் இருந்ததால்தான் நீங்கள் முதலமைச்சராக ஆனீர்கள். அன்று கூட்டணி இல்லை என்றால் உங்கள் ஆட்சி காலாவதி ஆகியிருக்கும். நீங்கள் தான் எங்களுக்கு துரோகம் செய்து விட்டீர்கள் என பேசினார்.