E Coli Bacteria: சென்னை குடிநீரில் 75% E Coli பாக்டீரியா.. ஐஐடி ஆய்வில் சொன்ன பகீர் தகவல்.. எப்படி பாதுகாத்துக்கொள்வது?

கோப்பு புகைப்படம்

உங்கள் வீட்டில் இருக்கும் நபர்களுக்கு அடிக்கடி நோய் ஏற்படுகிறதா? நீங்கள் குடிக்கும் தண்ணீர்தான் இதற்கு காரணம். சென்னையில் உள்ள 75% வீடுகளில் உள்ள நீர், வயிற்றுப்போக்கு மற்றும் வாந்தியை உண்டாக்கும் பாக்டீரியாவான ஈ கோலியால் மாசுபட்டுள்ளது என சென்னை ஐஐடி நடத்திய ஆய்வில் தெரியவந்துள்ளது. நீர் சுத்திகரிப்பு முறைகளைப் பயன்படுத்தும் குடும்பங்களும் இதில் அடங்கும். மக்கள் நீர் தரவு முன்முயற்சியின் ஒரு பகுதியாக மேற்கொள்ளப்பட்ட ஆய்வில், தண்ணீர் குழாய்கள், அசுத்தமான தொட்டிகள் அல்லது தண்ணீர் கொள்கலன்கள் பாக்டீரியாவின் ஆதாரமாக இருப்பது ஆய்வில் கண்டறியப்பட்டது. ஆராய்ச்சியாளர்கள் மற்றும் மாணவர்கள் 752 வீடுகளில் இருந்து (குழாய்கள், போர்வெல்கள் மற்றும் பிற ஆதாரங்களில் இருந்து) குடிநீர் மாதிரிகளை சேகரித்தனர். ஈ கோலை பாக்டீரியா, மலம் மாசுபடுவதன் மூலம் உணவு மற்றும் தண்ணீருக்குள் செல்வதாக் தெரிய வந்துள்ளது.

டெல் அவிவ் பல்கலைக்கழகத்தைச் சேர்ந்த சுசான் ககன் மற்றும் ஐஐடி மெட்ராஸின் நீர் தரத் திட்டத்தின் பாட ஒருங்கிணைப்பாளர்களில் ஒருவரான சுசான் ககன் கூறுகையில், “தண்ணீர் சுத்திகரிப்பான்களைப் பயன்படுத்துபவர்கள் கூட எப்போதும் பாதுகாப்பான மற்றும் சுத்தமான தண்ணீரைக் குடிப்பதில்லை. இதற்கு காரணம் ஒழுங்கற்ற முறையில் அதனை பராமரிக்கதது தான்” என தெரிவித்துள்ளார்.

பாதிக்கப்பட்ட 75% குடும்பங்களில் குழந்தைகள் இருப்பதும் தெரியவந்துள்ளதாக பாடநெறிக்கான பயிற்றுவிப்பாளர்களில் ஒருவரான டி பிரதீப் குறிப்பிட்டுள்ளார். மேலும், “இது எந்த தொழில்நுட்பம் அல்லது சிகிச்சையின் தேவையைப் பற்றியது அல்ல. இது பாதுகாப்பான குடிநீரை உறுதி செய்ய அதிக விழிப்புணர்வு தேவை என்பதை எடுத்துக்காட்டுகிறது. நீர் சுத்திகரிப்பு தயாரிப்பாளர்களின் வழிமுறைகளைப் பின்பற்றவும், தண்ணீர் கொள்கலன்களை காற்று புகாத, சுத்தமான மற்றும் நேரடி சூரிய ஒளியில் இருந்து விலக்கி வைக்கவும்” பிரதீப் அறிவுறுத்தியுள்ளார்.

ஐந்து வயதுக்குட்பட்ட குழந்தைகளில் 58% குழந்தைகள் நேரடியாக குழாய்களில் இருந்து தண்ணீரைக் குடிக்கிறார்கள், அதே நேரத்தில் 15% பேர் சுத்திகரிக்கப்பட்ட நீர் அமைப்புகளை நம்பியுள்ளனர். சுத்திகரிப்பு முறைகளைப் பயன்படுத்துபவர்களில், 73% பேர் தண்ணீரின் தரம் நன்றாக இருப்பதாக மதிப்பிட்டுள்ளனர், ஆனால் நீர் சுத்திகரிப்பு இல்லாத குடும்பங்களில் 31% பேர் மட்டுமே உள்ளனர். சமீபத்திய கணக்கெடுப்பில், 48% குடும்பங்கள் தங்கள் குடிநீரை குழாய்களில் இருந்து பெறுவதாகவும், 33% சுத்திகரிக்கப்பட்ட மற்றும் வடிகட்டிய நீர் அமைப்புகளை நம்பியிருப்பதாகவும் தெரிவித்தனர்.

Escherichia coli (E. coli) என்பது மனிதர்கள் மற்றும் விலங்குகளின் குடலில் பொதுவாகக் காணப்படும் ஒரு வகை பாக்டீரியா ஆகும். ஈ. கோலியின் பெரும்பாலான விகாரங்கள் பாதிப்பில்லாதவை மற்றும் குடல் ஆரோக்கியத்தை பராமரிக்க உதவுகின்றன, சில தீவிரமான உணவுப்பழக்க நோயை ஏற்படுத்தும்.

மேலும் படிக்க: 5 ஆண்டுகளுக்கு பின் நடந்த சந்திப்பு.. பிரதமர் மோடியும் அதிபர் ஜி ஜின்பிங் பேசியது என்ன? சமரசம் எட்டப்பட்டதா?

ஈ.கோலைக்கான அறிகுறிகளில் கடுமையான வயிற்றுப் வலி, வயிற்றுப்போக்கு மற்றும் வாந்தி ஆகியவை அடங்கும். தொற்றுநோயால் பாதிக்கப்பட்ட பெரும்பாலான மக்கள் பாக்டீரியாவைக் கொண்ட ஏதாவது ஒன்றை சாப்பிட்டு அல்லது குடித்த மூன்று முதல் நான்கு நாட்களுக்குப் பிறகு உடல்நிலை சரியில்லாமல் போகலாம் என தெரிவிக்கப்பட்டுள்ளது.

ஈ கோலி பாக்டீரியாவில் இருந்து நம்மை பாதுகாத்துக்கொள்ள கை கால்களை அடிக்கடி கழுவ வேண்டும். அதேபோல் வீட்டில் வைத்திருக்கு தண்ணீர் பாத்திரங்கள் திறந்து வைக்காமல் நன்கு மூடி வைக்க வேண்டும். மேலும், தண்ணீரை நேரடியாக குழாயில் இருந்து குடிக்காமல் கொதிக்க வைத்த தண்ணீரை எடுத்துக்கொண்டால் நல்லது. குறிப்பாக குழந்தைகள் இருக்கும் வீட்டில் தண்ணீர் பருகும் போது அதிக கவனம் தேவை. வயிற்றுப்போக்கு, காய்ச்சல், வாந்தி போன்ற அறிகுறிகள் தென்பட்டால் உடனடியாக மருத்துவரை அனுகி சிகிச்சை பெற வேண்டும்