Madurai Crime News: மதுரையில் நாம் தமிழர் நிர்வாகி வெட்டிக்கொலை.. அமைச்சர் வீட்டருகே நடந்த சம்பவம்.!

நாம் தமிழர் நிர்வாகி வெட்டி கொலை: மதுரையில் நாம் தமிழர் நிர்வாகி மர்ம நபர்களால் வெட்டிப் படுகொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது. சமீப காலமாகவே தமிழ்நாட்டில் அரசியல் கொலைகள் தொடர்ந்து அரங்கேறி வருகிறது. கடந்த மே மாதம் நெல்லை கிழக்கு மாவட்ட காங்கிரஸ் தலைவர் ஜெயக்குமார் தனசிங் கொல்லப்பட்ட நிலையில், ஜூலை 5ஆம் தேதி பகுஜன் சமாஜ் கட்சியின் தமிழ்நாடு மாநில தலைவர் ஆம்ஸ்ட்ராங் கொலை செய்யப்பட்டுள்ளார். இந்த சம்பவம் ஏற்படுத்திய பரபரப்பு அடங்குவதற்குள்ளேயே அடுத்த அரசியல் கொலை அரங்கேறியுள்ளது. மதுரை மாநகர் செல்லூர் பகுதியைச் சேர்ந்தவர் பாலசுப்பிரமணியன். இவர் நாம் தமிழர் கட்சி வடக்கு தொகுதி துணைச் செயலாளராக இருந்து வருகிறார். இந்த நிலையில், பாலசுப்பிரமணியன் இன்று காலை வல்லபாய் சாலை பகுதியில் நடைபயிற்சி மேற்கொண்டிருந்தார்.

Also Read: ஒரு கோடி வீடுகளுக்கு மின் கட்டணத்தில் மாற்றமில்லை.. லிஸ்டில் நீங்க இருக்கீங்களா?

அப்போது, மர்ம கும்பல் ஒன்று அவரை வழிமறித்து பயங்கர ஆயதங்களால் சரமாரியாக அவரை வெட்டியது. இதிலிருந்து அவர் தப்பித்து ஓட முயற்சித்தபோது அவரை விரட்டிச் சென்று வெட்டி படுகொலை செய்திருக்கிறது. தொடர்ந்து அவரது உடல் மதுரை அரசு ராஜாஜி மருத்துவமனைக்கு பிரேத பரிசோதனைக்காக எடுத்து செல்லப்பட்டது. மதுரை அமைச்சர் பழனிவேல் தியாகராஜன் வீட்டு அருகே இந்த கொலை சம்பவம் நடந்துள்ளதாக தகவல் வெளியாகி உள்ளது.

இதுகுறித்து தல்லாகுளம் போலீசார் வழக்குப்பதிவு செய்து விசாரித்து வருகின்றனர். முன்பகை காரணமாக கொலை நடந்ததா அல்லது குடும்ப பிரச்னை காரணமாக கொலை நிகழ்ந்ததா என்ற கோணத்தில் போலீசார் விசாரித்து வருகின்றனர். சென்னையில் ஆம்ஸ்ட்ராங் கொலை செய்யப்பட்டு 10 நாட்களே ஆன நிலையில், மற்றொரு கொலை சம்பவம் அரங்கேறியுள்ளது பெரும் அதிர்ச்சியை ஏற்படுத்தியுள்ளது.

Also Read: வங்கக்கடலில் உருவான காற்றழுத்த தாழ்வு பகுதி.. 2 மாவட்டங்களுக்கு கனமழை அலர்ட்!