“இளம் தலைவர்” ராகுல் காந்தியை பாராட்டி தள்ளிய செல்லூர் ராஜு.. புது ட்விஸ்ட்!

செல்லூர் ராஜு - ராகுல் காந்தி

“இளம் தலைவர்”:  நாடு முழுவதும் மக்களவை தேர்தல் விறுவிறுப்பாக நடைபெற்று வருகிறது. ஐந்து கட்ட வாக்குப்பதிவு முடிந்த நிலையில், இன்னும் 2 கட்ட தேர்தல் நடைபெற இருக்கிறது. இதனால், நாடு முழுவதும் அரசியல் கட்சி தலைவர்கள் தீவிர வாக்கு சேகரிப்பில் ஈடுபட்டு வருகின்றனர். பிரதமர் மோடி, மத்திய அமைச்சர் அமித்ஷா, காங்கிரஸின் ராகுல் காந்தி, பிரியங்கா காந்தி உள்ளிட்டோர் பரப்புரையில் ஈடுபட்டு வருகின்றனர். குறிப்பாக ராகுல் காந்தியின் பிரச்சாரம் எல்லா தலைவர்களையும் விட தனித்துவமாக இருக்கும். அதாவது, செல்லும் இடங்களில் எல்லாம் மக்களுடன் சகஜமாக பேசுவது, புகைப்படம் எடுத்துக் கொள்வது, சாப்பிடுவது, பணியாளர்களுடன் வேலை செய்வது என இப்படிதான் தனது பரப்பரையில் இருப்பார்.

சமீபத்தில் கூட தமிழ்நாட்டிற்கு வந்த ராகுல் காந்தி, இரவில் சாலை தடுப்பு சுவர் ஏறி குதித்து மைசூர் பாகு வாங்கி பணியாளர்களுடன் புகைப்படம் எடுத்து கொண்ட வீடியோ இணையத்தில் டிரண்டாகி பல லைக்ஸ்களை குவித்தது. இவர் இப்படி சமானிய மக்களுடன் பழங்குவது அனைவருக்கும் பிடித்திருக்கிறது என்றே சொல்லலாம்.

Also Read : “தமிழர்கள் திருடர்களா?” பிரதமரின் கருத்துக்கு கொதித்தெழுந்த ஸ்டாலின்!

ராகுல் காந்தியை பாராட்டி தள்ளிய செல்லூர் ராஜு:

இந்த நிலையில், கடந்த சில நாட்களுக்கு முன்பு, உணவக ஒன்றில் மக்களுடன் அமர்ந்து சாப்பிட்டிருக்கிறார். மேலும், அந்த ஹோட்டலில் இருக்கும் மக்களின் கேள்விகளுக்கு பதிலளித்து, அவர்களுடன் சிரித்து பேசி போட்டோ எடுத்துக் கொண்டிருக்கிறார். இந்த வீடியோக்கள் இணையத்தில் வெளியாகி டிரண்டாகி வருகிறது.

இந்த நிலையில், இந்த வீடியோவை முன்னாள் அமைச்சரும், அதிமுக மதுரை மாவட்ட செயலாளருமான செல்லூர் ராஜு தனது எக்ஸ் தளத்தில் பதிவிட்டுள்ளார். “நான் பார்த்து நெகிழ்ந்து ரசித்த இளம் தலைவர்” என்ற கேப்ஷனுடன் ராகுல் காந்தியின் வீடியோவை பதிவிட்டிருக்கிறார்.  திமுக கூட்டணியில் இருக்கு காங்கிரஸ் கட்சியின் தலைவரை செல்லூர் ராஜு புகழ்ந்து பேசி இருப்பது அரசியல் களத்தில் பேசும் பொருளாக மாறி உள்ளது. 

அதிமுக தலைமை I.N.D.I.A கூட்டணியை கடுமையாக விமர்சித்து வரும் நிலையில், செல்லூர் ராஜு ராகுல் காந்தியை பாராட்டி இருப்பது கேள்வியை எழுப்பியுள்ளது. தமிழகத்தை பொருத்தவரை இந்தாண்டு தேர்தலில் பாஜகவுடனான கூட்டணியை முறித்துக் கொண்டு அதிமுக, தேமுதிக உள்ளிட்ட கட்சிகளுடன் கூட்டணி வைத்து போட்டியிட்டது என்பது குறிப்பிடத்தக்கது. 

Also Read :  நாளை உருவாகும் காற்றழுத்த தாழ்வுப்பகுதி.. இன்று 4 மாவட்டங்களுக்கு ரெட் அலர்ட்!