Tamil Breaking News Live: சென்னையில் வெளுத்து வாங்கும் மழை..இன்றைய செய்திகள் உடனுக்குடன்!

தமிழகத்தைப் பொறுத்தவரை மழையில் தேவை அதிகமாக உள்ளது. அதேசமயம் மழை அதிகமாக பெய்தால் அதை எதிர்கொள்ளக்கூடிய தைரியம் அரசுக்கு உள்ளது. யாரும் மழையை கண்டு அச்சம் கொள்ள வேண்டாம் என வருவாய் மற்றும் பேரிடர் மேலாண்மைத்துறை அமைச்சர் கே.கே.எஸ்.எஸ்.ஆர். ராமச்சந்திரன் தெரிவித்துள்ளார்.

தமிழ்நாட்டில் பல்வேறு மாவட்டங்களிலும் கனமழை கொட்டித்தீர்த்து வரும் நிலையில் இன்று 21 செ.மீ., க்கும் அதிகமான மழை பெய்யும் என தெரிவிக்கப்பட்டுள்ளது. இதன் காரணமாக இந்திய வானிலை ஆய்வு மையம் ரெட் அலர்ட் விடுத்துள்ளது.

திருவண்ணாமலை மாவட்டத்தில் உள்ள சாத்தனூர் அணையில் இருந்து தண்ணீர் வெளியேற்றம் குறித்து ஆறாவது முறையாக வெள்ள அபாய எச்சரிக்கை விடப்பட்டுள்ளது.சாத்தனூர் அணையில் தண்ணீர் வரத்திற்கு ஏற்ப படிப்படியாக தண்ணீர் வெளியேற்றப்படும் என அதில் குறிப்பிடப்பட்டுள்ளது. இதனால் கடலூருக்கு வெள்ள அபாய எச்சரிக்கை விடுக்கப்பட்டுள்ளது.

புதுக்கோட்டை அருகே செங்கீரை பகுதியில் அபிராமி என்ற பெண்ணுக்கு அவரது கணவர் ராஜசேகர் வீட்டிலேயே பிரசவம் பார்த்துள்ளார். இதில் குழந்தை உயிரிழந்துள்ள சம்பவம் அதிர்ச்சியை ஏற்படுத்தியுள்ளது.

தமிழக எதிர்க்கட்சித்தலைவர் எடப்பாடி பழனிசாமி, ரஜினிகாந்துக்கு பிறந்தநாள் வாழ்த்துகளை தெரிவித்துள்ளார். தன் தனித்துவமான நடிப்பாற்றலால் உலகளாவிய ரசிகர் பட்டாளம் கொண்டவரும், என்றும் பழகுவதற்கு இனியவருமான அன்பு நண்பர் #சூப்பர்ஸ்டார் திரு.ரஜினிகாந்த் அவர்களுக்கு எனது இதயங்கனிந்த பிறந்தநாள் நல்வாழ்த்துகள். திரையுலக வாழ்வில் பொன்விழா ஆண்டில் உள்ள அன்பு நண்பர் திரு.ரஜினிகாந்த் அவர்கள், இன்னும் பல்லாண்டு பூரண உடல் நலத்துடன் ரசிகர்களை மென்மேலும் மகிழ்விக்க வாழ்த்துகிறேன் என கூறியுள்ளார்.

நடிகர் ரஜினிகாந்த் பிறந்தநாளை முன்னிட்டு முதலமைச்சர் மு.க.ஸ்டாலின் வாழ்த்து தெரிவித்துள்ளார். அவர் வெளியிட்டுள்ள பதிவில், “எல்லைகள் கடந்து ஆறிலிருந்து அறுபதுவரை அனைவரையும் தன்னுடைய நடிப்பால் – ஸ்டைலால் ரசிகர்களாக்கிக் கொண்ட அருமை நண்பர் சூப்பர்ஸ்டார் ரஜினிகாந்த் அவர்களுக்கு என் பிறந்தநாள் நல்வாழ்த்துகள்! திரையுலகில் தொடர் வெற்றிகளைக் குவித்து வரும் தாங்கள், எப்போதும் அமைதியோடும் மனமகிழ்ச்சியோடும் திகழ்ந்து மக்களை மகிழ்வித்திட விழைகிறேன்” என  கூறியுள்ளார்.

திருவண்ணாமலையில் நாளை கார்த்திகை தீபத்திருவிழா கொண்டாடப்பட உள்ள நிலையில் சென்னை தாம்பரத்தில் இருந்து சிறப்பு ரயில்கள் 13, 14,15 ஆகிய 3 நாட்கள் இயக்கப்படும் என தெரிவிக்கப்பட்டுள்ளது.

கேரளாவில் வைக்கம் போராட்டத்தின் நூற்றாண்டு நிறைவு விழா கொண்டாட்டம் களைகட்டியுள்ளது.அங்கு புரனமைக்கப்பட்ட பெரியார் நினைவிடத்தை முதலமைச்சர் மு.க.ஸ்டாலின் இன்று திறந்து வைக்கிறார்

கனமழை காரணமாக சென்னை, காஞ்சிபுரம், கடலூர், விழுப்புரம், தஞ்சாவூர், காஞ்சிபுரம், திருவண்ணாமலை, திருவாரூர், புதுக்கோட்டை, கடலூர், கரூர், மயிலாடுதுறை, ராமநாதபுரம், அரியலூர், செங்கல்பட்டு, திருவள்ளூர், ராணிப்பேட்டை, வேலூர், திருப்பத்தூர், தூத்துக்குடி ஆகிய மாவட்டங்களில் பள்ளி, கல்லூரிகளுக்கு விடுமுறை விடப்பட்டுள்ளது.

நாகப்பட்டினம் மாவட்டத்தில் உள்ள புகழ்பெற்ற நாகூர் சந்தனக்கூடு திருவிழாவை முன்னிட்டு இன்று அம்மாவாட்டத்தில் உள்ள பள்ளி, கல்லூரிகள், அரசு அலுவலகங்களுக்கு உள்ளூர் விடுமுறை விடப்பட்டுள்ளது.